اقوام متحدہ۔ 21 جنوری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ اقوا م متحدہ نا پدتموک ملک آتیکن جوڑ کروک پڑک آف 77 تینا باسک آتے کورونا نا دین آن بحالی، موسمیاتی بدلی نا وجودی خطرہ تون مون تننگ، پائیدار شونداری ہدف آتا دوئی کننگ کن مون تروک چیلنج آتے بڑزکو اولیت ترسا کیک۔ پڑک آف 77نا اسیجائی حوال اقوام متحدہ نا جنرل اسمبلی نا صدر عبداللہ شاہد و بوتسوانا نا سفیر و اقتصادی و راجی کونسل نا صدر ویکسن کیلاپل نا کنڈآن اڈتننگا ہراٹی پاکستان نا مندوب منیر اکرم ہرا 134 پدتموک باسک ملک آتا پڑک آف 77 نا چیئرمین ءِ حوال دیوان نا خیرمقدم ءِ کرسا پارے کہ نن دا قابل قدر شریداری ءِ امنا کینہ کہ دا ہم آہنگی نا گام گیج آتا کوشست آتے پیدوار کننگ و ہم آہنگی ءِمون آ دننگ کن نمائندگی ءِ کیک و نن دا باندات نا بابت پین گام گیج آتا خواست کینہ۔ اوپارے کہ ننے 3 بھلو چیلنج مون تروک ءِ ہرافتے ٹی کورونا دین آن بحالی ، پائیدار شونداری ہدف(ایس ڈی جیز) نا دوئی کننگ و موسمیاتی بدلی نا وجودی خطرہ اوار ءِ۔ اوپارے کہ پڑک آف 77 و چائنا داہیت آ یخین تخک کہ کورونا ویکسین نا دمدستی و بریبر فراوانی آن بیدس کورونا دین ءِ شکست تننگ نا چانس آک بھاز کم ءُ نیز ننے طبی ازباب آتا شونداری و بشخنگ تون اوار افرادی قوت(ملکیت دانش) ، ٹیکنالوجی نا گدریفنگ و ہندی و علاقائی مینوفیکچرنگ نا لائخی تے ودفنگ نا بابت پلو آتا کسر اٹ بروک اڑاند آتے ہم مرکننگ نا گرج ءِ۔ اوزور شاغا کہ زرگزران نا بحالی کن غٹ ممکنہ ذریعہ اٹ مالی وسیلہ ودی کننگ نا گرج ءِ انتئے کہ وام تا ودوک آ بھاریم پدتموک ملک آتیکن اسہ بھاز بھلو فریشانی اسے۔
