کابل۔ 19 جنوری (اے پی پی) اوغانستان نا عبوری وزیراعظم محمد حسن اخوند جہانی حکومت خاص وڑاٹ اسلامی ملک آتیان خواست کرینے کہ او اوغانستان نا حکومت ءِ جہانی کہول آ باضابطہ وڑاٹ امنا کیر و اوغان حکومت ءِ امناکروک آ اولیکو ملک جوڑ مریر۔ فرانسیسی خبررساں ادارہ نا رداٹ اوچارشنبے نادے آ دارالحکومت کابل اٹی نیوز کانفرنس اٹی پارے کہ ای مسلمان ملک آتیان خواست کیوہ کہ اوغانستان اٹی بھلا اقتصادی تنکی تون مون تننگ کن اوغان حکومت ءِ ایلو ملک آتیان مست جہانی کہول آ باضابطہ وڑاٹ امنا کیر۔ کنے اومیت ءِ کہ ہنداوڑ نن بھاز ترندی اٹ شون ہلنگ نا قابل مرینہ۔ داکان بیدس سعودی خبررساں ادارہ نا رداٹ کانفرنس اٹی وزیراعظم و طالبان انتظامیہ نا ایلو کمامدار و اقوام متحدہ نا کمامدارآک بشخ ہلکر۔ اوغان وزیراعظم و طالبان انتظامیہ نا ایلو کمامدارآک خواست کریر کہ اوغانستان نا میرات آتے بحال کننگے انتئے کہ ملک اٹی ودوک آ اقتصادی تنکی منجمد میرات آتا سوب آن ءِ۔ وزیراعظم پارے کہ گونڈ ءُ مد اسے نا امداد ویل آتا ایسر اف ہنداخاطرآن ننے اسہ ہندن ءُ کسر اس پٹنگ نا گرج ءِ ہراڑآن ویل آتے بنداوی وڑاٹ ایسر کننگ مرے۔
