اسلام آباد۔ 18 جنوری (اے پی پی) چین اٹی پاکستان نا سفیر معین الحق پارینے کہ چین پاکستان اقتصادی راہداری (سی پیک) فیزٹو انا دنگ بھاز بھلن ءِ، داٹی صنعت آتا گدریفنگ، کشاری بشخ انا جدید کاری، سائنس و ٹیکنالوجی ٹی کمکاری، روزگار نا ودی کننگ و مخلوق نا راجی و اقتصادی آسودہی آ چکار کننگ انگ ءِ۔ معین الحق گلوبل ٹائمز ءِ انٹرویو ترساپارے کہ ہڑتوم آ فریق گوادر پورٹ وگوادر فری ٹریڈزون نا شونداری آ ترندی اٹ پیش رفت کننگ ءُ ہراڑآن علاقائی رابطہ و اقتصادی شونداری ءِ مون آ دننگک۔ اوپارے کہ تدوک آ 2 سال اٹی کوویڈ۔ 19 نا جہانی دین آن مون تروک چیلنج آتیان پد ہم سی پیک نا رداٹ کمکاری و غٹ ڈٹ آتیاکاریم بیدس اڑاند آن برجاءِ۔ اوپارے کہ اسیجائی کمکار کمیٹی نا ساڑی ٹی مروک آ 10 می دیوان اٹی سی پیک فریم ورک نا رداٹ بھلو کچ اسے آ کمکاری نا جاچ ءِ ہلسا پین بشخ آتاہم پیدواری ءِ کننگانے۔ اوپارے کہ 10 می سی پیک فریم ورک اٹ انفارمیشن ٹیکنالوجی و صنعت آ اسہ اسیجائی ورکنگ پڑک اس جوڑ کننگانے ہراڑآن ہڑتوم آ ملک آتا وژن نا رداٹ سی پیک اٹ بڑزکو آب انا شونداری ٹی کمک رسینگک۔ سی پیک نا ساڑی آ حالیت، اونا تعمیراتی کاریم و توانائی نا کمتی نا بارواٹ ہیت کرسا سفیر پارے کہ میگا پروجیکٹ اقتصادی کمکاری و رابطہ غاتے ہڑتوم آ کنڈآتا ایجنڈا نا مون آ تخسا پاک چین تعلقداری ٹی اسہ پوسکن ءُ دور اسے نا پیدواری ءِ کننگانے۔ اوپارے کہ بیلٹ اینڈ روڈ نیشٹو(بی آر آئی ) نا اسہ اہم ڈٹ ءُ ڈٹ اس سی پیک ءِ ہرانا مسخت سڑک، ریل ، فائبر آپٹک کیبل، انرجی پیپ لین ، صنعتی کلسٹرآتا نیٹ ورک نا کمک اٹ پاکستان ، چین و ایلو ڈیہہ نا نیام اٹ رابطہ و واپاری رابطہ غاتے ودفنگ ءِ۔
