بیجنگ۔ 14 جنوری (اے پی پی) چین نا وزارت واپار نا جاری کروک حساب وکتاب نا رداٹ 2021اٹی چین اٹی درملکی زرکاری نا کل کچ 11 کھرب یوان آن گدرینگانے ہراکہ اسہ تاریخی ءُ ریکارڈ اسے۔ چینی ریڈیو نا رداٹ تدوک آ سال اٹی چین اٹی درملکی زرکاری نا کل مالیت 11 کھرب 49 ارب 36 کروڑ یوان اسکان سرمس ہراٹی تدوک آ سال انا مقابلہ ٹی 14.9 درسد نا ودکی مسنے۔ اوٹی ہائی ٹیک نا صنعت اٹی درملکی زرکاری نا ودکی نسبتا ترند ئس ہراکہ تدوک آ سال آن 17.1 درسد زیات ءِ۔ چین نا وزارت واپار نا رداٹ دی بیلٹ اینڈ روڈ اتون وابستہ ملک و آسیان ملک آتا کنڈآن زرکاری ٹی بالترتیب29.4 درسد و 29 درسد نا ودکی مس۔ چین امریکہ اقتصادی و واپاری تعلقداری تا بابت وزارت واپار نا ترجمان شوجیوننگ پارے کہ داسکان تو فریق آتا اقتصادی و واپاری ڈل معمول نا رابطہ ٹی ءُ۔
