نیویارک۔ 14 جنوری (اے پی پی) اقوام متحدہ نا سیکرٹری جنرل انتونیوگوٹیرس جہانی برادری آن لکھ آ اوغان تے پین مشکل آتیان بچفنگ کن دمدستی گام گیج آتا خواست کرینے۔ اواسہ پریس کانفرنس اسے ٹی پارے کہ ننے راجی و زرگزرانی بھسکاری ءِ توننگ و لکھ آ اوغانی تے پین مشکل آتیان بچفنگ کن دمدستی ایسر اس پٹنگ نا گرج ءِ۔ اوپارے کہ اوغانستان نا حالیت آک پین خراب مسنو۔ اقوام متحدہ امریکہ و جہانی بینک آ زور شاغا کہ او اوغان فنڈ آتے منجمد کے ہرا طالبان تا اقتدار اٹ پدی بننگ آن پد بند ءُ تانکہ اوغانستان اٹی بروک آ مشکل آتے توننگ مرے۔ اومستی پارے کہ داٹی امریکہ بھاز اہم ءِ انتئے کہ دنیا نا زیات تر مالیاتی نظام ڈالر اٹ چلینگک۔ اوپارے کہ امریکہ و دنیا نا چندی ایلو ملک آتیٹی فنڈآتا جوان ءُ کچ اسے ہرا منجمد ءُ و اوفتے لاگو کننگ کن پین کنڈاسے آ کننگپ۔ اوپارے کہ اقوام متحدہ پارے کہ نن اوغانستان اٹی بنداوی گرج آتا فراوانی کن سخت خواری کننگ اُن۔ اوپارے کہ ورلڈ بینک اوغانستان کن تعمیر نو نا ٹرسٹ فنڈ آتا بست وبند کیک و تدوک آ تُو دابینک دافنڈ آن 280 ملین ڈالرز اقوام متحدہ نا چناتا فنڈز و ورلڈ فوڈ پروگرام کن اوغانستان آ گدریفے۔ اواومیت ظاہر کرے کہ 1.2 بلین آن زیات ڈالرز اوغانستان نا مخلوق ءِ یخ انا موسم اٹ امداد کن دوئی مریک۔ اقوام متحدہ نا سروک داوخت آ طالبان تیان زالبول آتا حق انا رکھ انا خواست ہم کرے۔ اوپارے کہ اسہ ملک اس ہم تینا نیمہ آبادی نا حق آن انکار کرسا شون ہلنگ کپک۔ اقوام متحدہ جہانی برادری آن اوغانستان کن 5 بلین ڈالرز آن زیات مالی امداد نا خواست کرے تانکہ اوغانستان نا 22 ملین آن زیات بندغ آتا بنداوی گرج آتے پورو کننگ مرے۔
