اسلام آباد۔ 05 جنوری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ پاکستان بھارت نا غیرکانودی کوزہ گیری ٹی جموں و کشمیر نا الس نا اخلاقی، سفارتی و سیاسی مخ تفی ءِ ہمووخت اسکان برجاتخک ہراتم اسکان اقوام متحدہ نا قراراداد آتا رداٹ کشمیریک تینا حق خودارادیت ءِ دوئی کپسہ۔ اوچارشنبے نادے آ یوم حق خودارادیت کشمیر نا وخت آ نیویارک اٹی تینا کلہو اٹی پارے کہ اقوام متحدہ، خاص وڑاٹ سلامی کونسل نا دا زمواری ءِ کہ او 73 سال مست جموں و کشمیر نا الس تون کروک آ قول ءِ پورو کے۔ اوپارے کہ اقوام متحدہ نا کمیشن بھارت و پاکستان (یواین سی آئی پی) 5 جنوری 1949آ اینونادے تاریخی قراراداد اس منظور کرے ہراٹی اقوام متحدہ نا کنڈآن مقبوضہ جموں و کشمیر اٹی آجو وبے کنڈ ہلوک استصواب رائے نا خواست کننگا تانکہ اونا الس تینا سیاسی آخبت نا فیصلہ ءِ کننگ کیر۔ داقراراداد کشمیری الس نا حق خودارادیت نا دوئی کننگ نا آخبتی و مریس جہد نا اقوام متحدہ نا عزم انا نشانی ءِ۔ اوپارے کہ بھارت نا انتہاپسند ہندوتوا حکومت و جموں و کشمیر اٹی تعینات 9 لکھ بھارتی فوجی کشمیر اٹی دہشت گردی نا ظالمانہ راج ءِ برجاتخنگ نا زموار ءُ۔ اوپارے کہ بھارت جموں و کشمیر اٹی کشمیری سیاسی راہشون تے قید اٹ تخنگ، ہزار آ کشمیری ورناتا غیرکانودی دزگیری، عدالت آن ایڑتر خون، کشمیری تا پرامن مچی تے بیدادی اٹ توننگ کن کرفیو و مواصلاتی بلیک آؤٹءِ کاریم اٹ ایس۔ پیلٹ گن آتا کاریم اٹ اتنگ ہراڑآن چناک کور مسر و کشمیری تے اجتماعی سزا تننگ نا وڑاٹ مچ آ محلہ و خلق آتے دڑفنگا۔ اوپارے کہ بھارت نا ہندوتوا انتہاپسندسرکڑدہ غاتا کنڈآن تیار کروک آ تشویشناک ایسر کشمیری تا تحریک آجوئی ءِ لتاڑنگ و جہانی وڑاٹ امنا مروک متنازعہ ریاست نا ڈیموگرافی ءِ آخبتی وڑاٹ بدل کننگ نا مساوی ءِ۔ اوپارے کہ 5 اگست 2019 نا گام آن پد آن بھارت دمدستی وڑاٹ جموں و کمشیر نا مسلم گیشتری والا علاقہ غاتے ہندوگیشتری اٹ بدل کننگ نا ڈٹ انا رداٹ لکھ آ جعلی ڈومیسائل جاری کرے۔ داگام گیج نسل کشی ءِ توننگ نا کنونشن تون اوار جہانی انسانی کانود نا اسُل خلاف ورزی ءِ۔ پاکستان نا آخبتی مندوب منیر اکرم انسانی حق انا جہانی تنظیم تیا زور شاغاکہ او جموں و کشمیر اٹی بھارت نا ڈوہ انا درک ءِ خلے و بھارت آ زور شاغے کہ او کشمیری الس نا برخلاف ظلم انا چرجوئی ءِ دمدستی بند کے، 5 اگست 2019 آن پد آن کروک آ غٹ غیرکانودی و اسہ کنڈی گام گیج آتے پدی ہلے و کشمیری تا نسل کشی ءِ کرسا ہندوتا آبادکاری نا ڈٹ ءِ تورے۔
