تہران۔ 22 دسمبر (اے پی پی) ایرانی وزیر خارجہ حسین امیر عبداللہیان پارینے کہ جہانی برادری اوغان الس نا زند انا حالیت آتیا خاص چکارتخے۔ ایرانی خبررساں ادارہ نا رداٹ داہیت ءِ حسین امیر عبداللہیان اقوام متحدہ نا ہائی کمشنر مہاجرین فیلیپو گرانڈی تون وڑدہی ٹی گپ وتران کرسا پارے۔ اوپارے کہ ایران اٹی داخہ لائخی اف کہ او پوسکن آ پناہ گزین تے پوسکن ءُ خذمت فراوان کننگ کے ہنداخاطرآن جہانی برادری ءِ اوغان الس نا زند انا حالیت آتیا خاص چکارتروئی مریک۔ اوڑدہی ٹی امیر عبداللہیان اوغان پناہ گزین تیکن یو این ایچ سی آر نا کمک آ منت واری ءِ ہرفسا پارے کہ دا چرجوئی ٹی فراوان کروک آ امداد ننا ملک انا گام گیج آتا کچ انا مقابلہ ٹی بھاز کم ءِ۔ اوپارے کہ ایران اٹی 52 ہزار آن زیات درملکی طالب علم مفت تعلیم دوئی کننگ ءُ و اوغان پناہ گزین تے ہم ایرانی شاری تیانبار کورونا نا ویکسین خلنگانے۔ ایرانی وزیر خارجہ مستی پارے کہ ہمسایہ سیم تیٹی اوغان مہاجرآتا کچ بھاز زیات ءِ و جہانی امداد نا کچ بھاز کم ءِ، یورپی ملک آک تینا کڑد ءِ ادا کیر۔ اقوام متحدہ نا ہائی کمشنر مہاجرہم پوسکن آ اوغان مہاجرآتا کمک کن ایران نا کوشست آتا ستاءِ کرے۔ اومستی پارے کہ اوغان الس کن فنڈ یکجا کننگ کن جہانی دیوان اس اڈتننگ نا خیال اہم ئس۔
