اقوام متحدہ۔ 17 دسمبر (اے پی پی) اقوام متحدہ ٹی پاکستان نا آخبتی مندوب منیر اکرم اوغانستان اٹی ساڑی آ انسانی و زرگزرانی تنکی تون مون تننگ نا دمدستی گرج آ زور شاغسا پارینے کہ دانا ایسر کننگ آن بیدس پاکستان و دنیا ءِ بین و افلاس آن بچنگ کن ایلو ملک آتیٹی ہمپوک آ لکھ آ اوغان مہاجر آتا بننگ نا گمان تون مون تروئی تمنگ کیک۔ اوتدوک آ دے اقوام متحدہ نا ہائی کمیشن مہاجر آتا کنڈآن اڈ ہلوک ورچوئل شرہ ٹی پاکستان اٹ کم و ود 40 لکھ اوغان مہاجر آتا ساڑی گری نا کنڈآ اشارہ کرسا پیدورا کرے کہ دا 40 سال اٹ پناہ گزین آتا ارٹ میکو غٹ آن بھلا کچ ءِ و پاکستان پین اوغان مہاجر آتا مہمانداری ءِ سگنگ کپک۔ شرہ نا سرحال ’’مسہ سال اٹی پناہ گزین تیا جہانی اثر، جبری ہمپنگ آ کمکاری ءِ پبی ردعمل اسے نا دروشم تننگ‘‘ ئس۔ اوپارے کہ اوغان مہاجر آتا ہروڑنا پوسکن آ ریسہ نا مہمانداری ءِ جہانی برادری نا ایلو باسک آتے کروئی مریک۔ اوپارے کہ اوغانستان اٹی انسانی بھسکاری آن بچنگ و پناہ گزین تا اسہ پین بھلو ریسہ سے توننگ کن جہانی برادری ءِ اوغانستان نا الس ءِ دمدستی انسانی و زرگزرانی امداد فراوان کے۔ اوپارے کہ پاکستان اوغان مہاجر آتیکن جامع، فراخدالانہ و ہمدردانہ نقطہ نظر تخک و داوخت آ لکھ آ اوغان مہاجر آتا مہمانداری ءِ کننگ ءِ ہرا انسانی ہمدردی نا اصول آتا رداٹ ءِ و کورونا نا دین آن مست و اونا وخت آ پاکستان مہاجر آتے جان جوڑی ، تعلیم و گزربسر نا آسراتی کن بریبر و بے اڑاند رسینگ فراوان کرینے۔ دا چرجوئی ٹی او ڈونرزآتیان خواست کرے کہ او مہاجر آتا مہمانداری کروک آ ملک آتے وخت آ، گمانی و کثیر سالہ گرانٹ فنڈ فراوان کرسا اوفتے کمک ءِ کیر۔ پناہ گزین تا خودانحصاری ءِ ودفنگ کن میزبان ملک آتے مالی و تکنیکی مدد نا کمک اٹ تعلیم وکسب نا شونداری نا گرج ءِ۔ اوپارے کہ جہانی برادری مہاجر آتا مہمانداری کروک آ ملک آتیکن اوفتا وطن آ واپسی نا پورو کمک فراوان کننگ نا پروگرام تا بایدے بناءِ کے، مہاجر آتا باوہ پیرہ ئی ملک آتا سرکاری شونداری امداد (او ڈی اے) نا وسیلہ غاتیٹی ودکی کے تانکہ او وطن آ پدی بروک آتے امنا کننگ نا قابل مننگ کے۔
