کابل۔ 14 دسمبر (اے پی پی) چین نا کنڈآن عطیہ کروک یخ انا موسم نا گڑاتا ارٹ میکو کھیپ اوغانستان نا دارالحکومت کابل آ سرمسنے۔ چینی خبررساں ادارہ نا رداٹ نگران حکومت نا نائب وزیر مہاجرین ارسلاخروتی و اوغانستان اٹی چین نا سفیر وانگ یو کابل اٹ حوالگی نا دود اٹ بشخ ہلک۔ یخ انا موسم نا گڑاتا دا کھیپ اٹ 70،000 آن زیات کمبل و 40،000 آن زیات کوٹ اوار ءُ۔ چینی سفیر دود آن تران کرسا پارے کہ دا حالیت آتیٹی چین اوغانستان ءِ خور اتون اوار پین امداد فراوان کرسا کیک۔ اوپارے کہ اوغانستان نا جوان انگا ہمسایہ نا وڑاٹ، چین اوغانستان نا ساڑی آ مشکل آتا مون ءِ توننگ اٹ کمک کننگ کن تیار ءِ۔ داوخت آ نائب وزیر مہاجرین ارسلا خروتی ہلہلہ ئی گڑا فراوان کننگ آ چین نا منت واری ءِ ہرفے انتئے کہ بھاز انگا اوغان مخلوق مشکل وخت اتون مون تننگ ءُ۔ اومستی پارے کہ دا کمکی گڑاتے مچ آ ملک انا حقدار بندغ آتیٹی بشخنگک۔
