اقوام متحدہ۔ 10 دسمبر (اے پی پی) اقوام متحدہ نا انڈر سیکرٹری جنرل روز میری ڈی کارلو اوغان الس تون جہانی ادارہ نا عزم و اسہ جامع ، منصفانہ و پرامن راج اسے نا جوڑ کننگ کن اوفتا کوشست آتا مخ تفی ءِ برجاتخنگ و اوغان الس ءِ تنیا اِلیپننگ نا عزم انا درشانی ءِ کرے۔ چینی خبررساں ادارہ نا رداٹ انڈر سیکرٹری جنرل فار پولیٹکل اینڈ پیس بلڈنگ افیئرز اوغانستان نا 3 دے ئی دورہ نا ایسر آ تدوک آ دے اسہ بیان اسے ٹی پارے کہ اقوام متحدہ اوغانستان اٹی 1949آن کاریم کننگ ءِ و ساڑی آ تنکی تیٹی اوغان الس ءِ تنیا اِلیپک۔ اقوام متحدہ نا سیکرٹری جنرل نا پریس دفترجاری اسہ بیان اسے ٹی پارے کہ روز میری ڈی کارلو دورہ اوغانستان اٹی کابل اٹ طالبان تا عبوری حکومت نا سینئر نمائندہ، سیاسی شخصیت، زالبول راہشون سول سوسائٹی و سفارتی باسک آتون اوڑدہی کرے و داہیت ءِ دُوارہ کرے کہ اقوام متحدہ اوغانستان اٹی اڈ کیک و خذمت سرایتک۔ اوداہیت ءِ پک کننگ نا بنداوی اہمیت آ زور شاغا کہ غٹ اوغان، نرینہ، نیاڑی ، ورناو مذہبی و نسلی پڑک حکومت و السی زند اٹی بشخ ہلنگ کیرہ۔ انڈر سیکرٹری جنرل روز میری ڈی کارلو پارے کہ اوغان الس و دنیا دہشت گردی نا توننگ، انسانی حق انا پاسداری و شمولیت نا عمل نا بابت دا گام گیج آتیٹی بھاز است خواہی تخک ہرا طالبان کمامدار آک دا چرجوئی ٹی ہرفرہ۔ اوپارے کہ اوغانستان اٹی زالبول و مسن تے مون تروک حالیت آتا بارواٹ سنجیدہ و قابل فہم گڑتی ءِ۔ ای دورہ ٹی خناٹ کہ اوغان زالبول و مسنک بے پرخ اسکول آ ہِننگ، کاریم کننگ و السی زند اٹ بشخ ہلنگ نا قابل مننگ خوارہ۔ دا بابت انت پیش رفت اس مسنے اودے بایدے برقرار سلے۔ ڈی کارلو جزوی وڑاٹ لیکویڈیٹی تنکی و بنداوی خذمت آتا فراوانی ٹی کمتی نا بابت پارے کہ جہانی مالیاتی ادارہ و جہانی برادری اتون لیکویڈیٹی نا حالیت آتے کم کننگ و پورو اقتصادی و راجی بھسکاری ءِ توننگ کن کاریم برجاءِ۔
