اقوام متحدہ۔ 09 دسمبر (اے پی پی) اقوام متحدہ نا سلامتی کونسل عراق اٹ ساڑی آ اِرا دہشت گرد جلہو آتا ترندی اٹ مذمت ءِ کرینے۔ چینی خبررساں ادارہ اقوام متحدہ نا کنڈآن جاری اسہ بیان اسے نا بابت پارینے کہ سلامتی کونسل نا باسک آک تدوک آ دے بصرہ ٹی مروک آ دہشت گرد جلہو نا مذمت ءِ کریر ہراٹی چار بندغ زوال و 20 پین ٹھپی مسوسر، باسک آک قطبی عراق اٹ جمعہ نادے آ مروک آ دہشت گرد جلہو نا ہم مذمت ءِ کریر ہرانا زمواری ءِ داعش امنا کریسس، او جلہو اٹی 13 بندغ زوال کریسر۔ باسک آک زہمی خاہوت و عراق نا حکومت تون تینا ہمدردی و ہڑزخواہی نا درشانی ءِ کریر و ٹھپی مروک آتا زوت دراخ جوڑی کن دعا کریر۔