کابل۔ 07 دسمبر (اے پی پی) اوغان حکومت جنگل آتا گڈنگ و پاٹ تا اسمگلنگ ءِ توننگ کن فوجی یونٹ اس تعینات کننگ نا پڑو کرینے۔ طالبان حکومت نا نائب ترجمان انعام اللہ سمنگانی ٹویٹر آ نوشتہ کرینے کہ اوغانستان اٹی طالبان تا حکومت مشی آ ملک اٹی جنگل آتا رکھ و جنگل آتا گڈنگ ءِ توننگ کن اسہ فوجی یونٹ اس جوڑ کرینے۔ اومستی نوشتہ کرے کہ امارت اسلامیہ اوغانستان نا کابینہ نا کنڈآن منظور مروک 450 باسکی فوجی یونٹ ءِ پستہ کون آ فصل انا پیدوار و مچ آ ملک اٹی باقاعدہ جنگل آتیٹی تعینات کننگک۔ ترجمان مستی پارے کہ کانودی وڑاٹ جنگل آتا گڈنگ و پاٹ تا اسمگلنگ ءِ توننگ کن یونٹ نا 100 اسکان بندغ آتے قومی دارالحکومت کابل و اوڑتون کیبی علاقہ غاتیٹی کاریم تننگک وخت اس کہ 50 بندغ آتے دا 7 صوبہ کنڑ، نورستان، خوست، لغمان ، پکتیا ، پکتیکا و ننگرہار اٹی کاریم تننگک۔ ترجمان مستی پارے کہ اوغان حکومت کشاری بشخ اٹ زرکاری کن گام گیج کرینے انتئے کہ ساڑی آ سال تیٹی خشک سالی تون اوار اوار خلقی آ علاقہ غاتیٹی پدریسہ جنگ و نزوری نا سوب آن جم کشاری پیدوار اٹ ڈرامائی وڑاٹ کمتی واقع مسنے۔
