اقوام متحدہ۔ 01 دسمبر (اے پی پی) پاکستان جہانی کہول آ اسہ پین سفارتی سرسہبی اس دوئی کرسا 2022کن اقوام متحدہ نا 134 پدتموک ملک آتا سیوت آ تالان پڑک، پڑک آف 77 اینڈ چائنا نا چیئرمین گچین مسنے۔ اقوام متحدہ ٹی پاکستان نا آخبتی مندوب منیر اکرم تدوک آ دے پاکستان نا بطور چیئرمین گچین مننگ آن پد پڑک آف 77 نا وزرائے خارجہ نا سالانہ ورچوئل دیوان آن تران کرسا پارے کہ او پڑک نا فائدہ و مسخت آتے مون آ دننگ اٹ شفافیت، شمولیت و معروضیت نا بنداو آ کاریم کیک۔ اوپارے کہ پاکستان نا 2022کن جی۔ 77 اینڈ چائنا نا چیئرمین گچین مننگ ننکن گمر نا سوب ءِ۔ اوپارے کہ اقوام متحدہ ٹی جی۔77 اینڈ چائنا نا غٹ ملک آتا اجتماعی اقتصادی فائدہ غاتے مون آ دننگ کن پاکستان بروک آ سال بناآ جمہوریہ گنی آن پڑک نا سرکڑدہ ئی نا چار ج ءِ ہلیک۔ اقوام متحدہ نا پڑک آف 77 ءِ 1964 اٹی جوڑ کننگاسس و پاکستان 3 وار (1976,1992و 2007اٹی ) داپڑک نا کماشی ءِ کرینے۔ تدوک آ دے جمہوریہ گنی نا خارجہ امور و جہانی کمکار نا وزیر نا چیئرمین شپ اٹ مروک آ دیوان نا بناٹی پاکستان نا وزیرخارجہ شاہ محمود قریشی، اقوام متحدہ نا جنرل اسمبلی ناصدر عبداللہ شاہد و اقوام متحدہ نا سیکرٹری جنرل انتونیوگوتریش ئسک ہم تران کریر۔ داوخت آ پاکستانی مندوب منیر اکرم پارے کہ جی۔ 77 ءِ خوفناک چیلنج مون تروک ءِ، کورونا نا دین، پائیدار شونداری نا ہدف (ایس ڈی جیز) نا دوئی کننگ و پڑک نا متعین کروک آب وہوا نا ہدف آتے مون آ دننگ مشکل ءِ ولے پڑک نا سیوت و یکجہتی آن ننے یخین ءِ کہ جی۔ 77 اینڈ چائنا داغٹ چیلنج آتا مون ءِ توننگ و ہدف آتا دوئی کننگ اٹ سرسہب مریک۔ دیوان نا ایسر آ پاکستانی مندوب منیر اکرم اینخو سال اٹی جمہوریہ گنی نا پبی کمکاری آ منت واری ءِ ہرفے و دا غٹ ملک آک، وزیر آک و مندوبین تا منت واری ءِ ہرفے ہرافک پاکستان ءِ پڑک نا چیئرمین گچین مننگ آ مبارکبادی تسنو۔
