اقوام متحدہ۔ 01 دسمبر (اے پی پی) اوغانستان اٹی اقوام متحدہ نا دفتر کمکار انسانی امور(اوسی ایچ اے) پارینے کہ اوغانستان اٹی اقوام متحدہ و اونا شریدار آک ہزار آ اوغان شاری تیٹی یخ آن بچفوک باسن ءُ پُچ، تمبو، کمبل، باسن تخوک ءُ گڑا ایندھن و نغد زر بشخار۔ چینی خبررساں ادارہ نا رداٹ او سی ایچ اے تدوک آ دے پارے کہ اقوام متحدہ و اونا شریدار آک گڑاس ہند آتیا منفی درجہ حرارت نا رداٹ یکم ستمبر آن 15 نومبر اسکان اوغانستان نا 32 صوبہ غاتے ٹی 23 ہزار 800 اوغان شاری تے یخ آن بچفوک کمکی گڑا بشخار ہرافتے ٹی باسن ءُ پچ، کمبل ، باسن ءُ گڑا ، ایندھن و نغد زر اوار ءِ۔ اقوام متحدہ نا رابطہ کار دفتر پارینے کہ اقوام متحدہ و انسانی ہمدردی نا شریدار آک دوشنبے نادے آ اوغان صوبہ کنڑ، ننگرہارارنورستان اٹی 32 ہزار 200 اوغان شاری تیٹی کمکی گڑابشخار۔ دفترپارے کہ اقوام متحدہ دوشنبے نادے آ صوبہ جوز جان اٹی اسہ ہزار 750 بندغ آتے ٹی نغد زر بشخا۔ داپروگرام اٹی ہندی وڑاٹ بے اُرا بندغ، خشک سالی آن زہمی بندغ، پدی بروک آ نیزگار اوغان، زالبول و چناتا سرپرستی ءِ کروک آ اُرا، بزرگ و معذور بندغ آتے اولیت تننگانے۔ اوسی ایچ اے پارے کہ انسانی ہمدردی نا تنظیمک ڈونرز برادری نا کنڈآن امداد کن منت وار ءُ۔ اوغانستان نا 2021اٹی کروک آ تازہ انگا اپیل آ ملوک آ امداد 677 ملین ڈالر مس ہراکہ کل امداد نا 112 درسد ءِ وخت اس کہ انسانی ہمدردی نا بنداو تیا امداد نا ڈٹ اٹی 729 ملین طلب کننگانے ہراکہ دا ڈٹ انا ورندی ٹی ملوک آ امداد نا 84 درسد ءِ۔ مالی امداد نا گڑاس قول آتیا اوغانستان نا مالی نظام ءِ مون تروک چیلنج آتا بناآ ہچ ءُ کارروائی اس مننگ کتو انتئے کہ داوخت آ اوغانستان ءِ خواتہ مننگ و کرنسی نا تنکی ہم مون تروک ءِ۔
