اقوام متحدہ۔ 30 نومبر (اے پی پی) پاکستان جھیڑہ غاتیان زہمی ملک آتے ٹی اقوام متحدہ نا امن سازی کمیشن نا امن نا کوشست آتا ستاءِ کرسا خواست کرینے کہ ادارہ نا امن سازی نا سرجزآتے کن فنڈ آتے ٹی ودکی کننگے ہرانا مسخت زہمی ملک آتے ٹی زرگزراننی و مالی سوگوی اتنگ ءِ۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا امن سازی کمیشن نا امن نا فنانسنگ آ اڈ ہلوک سالانہ دیوان اٹی پارے کہ پاکستان اقوام متحدہ ٹی 6 دہائی آن فوجی کمک کروک آ ملک انا وڑاٹ براہ راست داخنانے کہ ہراوڑ اقوام متحدہ ناامن سازی بیدادی ءِ کم کننگ و جھیڑہ غاتیان زہمی ملک آتے ٹی امن و سوگوی نا بحالی کن اسہ عمل انگیز اسے نا وڑاٹ کاریم کننگ کیک۔ اوپارے کہ پاکستان نا امن فوجیک امن نا کوشست آتا پوروی کن اکثر تینا وسیلہ غاتے متحرک کرینوو داوڑنا کوشست آتا فائدہ غاتے ’’ گہرے اور دورس‘‘ گوندانے۔ اوچندی امن مشن تیٹی امن نا سرجزآتے کن جتا پروگرامی فنڈنگ نا حوالہ ءِ ترسا زور شاغا کہ کمیشن کن ساڑی آ فنڈنگ نا چرجوئی ءِ برقرار تخنگ نا گرج ءِ۔ اوپارے کہ فنڈنگ نا دا اہم چرجوئی بایدے چٹپ بلکن حقیقت اٹ اودے سلامتی کونسل نا مناسب مینڈیٹ نا کانود سازی و مناسب مینڈیٹ نا وسیلہ غاتا کمک اٹ ودفنگے ہراٹی امن نا دا پہلو نا ہم احاطہ ءِ کننگے۔ اوپارے کہ امن کن ودکی وسیلہ غاتے متحرک کننگ کن گچین مروک آ ملک آتا مخصوص گرج و اولیت آتے تعلقدار ملک آتا حکومت آتا کنڈآن بے مٹ وڑاٹ بایدے شناخت کننگے۔ ولدا داگرج آتے مخصوص ڈٹ آتے ٹی بایدے بدل کننگے و اوکان پد پیس بلڈنگ فنڈ اتون اوار دا ڈٹ آتے کن ہڑتوم آ کنڈآتا و کثیر الجہتی ذریعہ اٹ مالی امداد ءِ متحرک بایدے کننگے۔ اوپارے کہ پاکستان ہروڑاٹ پیس بلڈنگ فنڈ(قیام امن فنڈ) انا ودکی نا مخ تفی ءِ کیک ہرافتے ٹی ساڑی آ ڈونرآتا کنڈآن بھلا عطیہ، پوسکن آ ڈونر ملک آتا کمک ، خاص وڑاٹ ہمو ملک آک ہرافتا قومی سلامتی نا فائدہ خاص ءُ ملک اسے جھیڑہ غاتیان پیش تمنگ اٹ سوگو کننگ اٹی ءِ و ادارہ خاص وڑاٹ جہانی مالیاتی ادارہ (آئی ایف آئی) کثیر الطرفہ شونداری بینک آتا کمک اوار ءِ۔
