جنیوا۔ 30 نومبر (اے پی پی) پاکستان کورونا دین انا پوسکن آ وڑ اومیکرون نا برخلاف پورو و جوان وسیلہ غاتیان شُپ جہانی جان جوڑی نا رکھ انا فریم ورک اسے نا خواست کرینے تانکہ آخبت اٹ دینی مرض آتے گچین وڑاٹ توننگ مرے۔ جنیوا ٹی اقوام متحدہ دفتراٹی پاکستان نا سفیر و آخبتی نمائندہ خلیل ہاشمی داخواست ءِ کورونا نا دین انا ویل آ معاہدہ نا بارواٹ جہانی ادارہ جان جوڑی نا گورننگ بادی نا اڈ ہلوک 3 دے ئی خصوصی دیوان اٹی گپ وتران کرسا کرے۔ اوپارے کہ ہرانسان ءِ جان جوڑی نا بڑزکو آب آتیان لطف اندوز مننگ ناحق دوئی ءِ، اوپارے کہ کورونا نا دین جہانی جان جوڑی نا رکھ انا ساڑی نظام نا نزوری و خلاءِ بے نقاب کرینے کہ ہراوڑ اونا حکمرانی و کانودی فریم ورک اتون اوار اوار وسیلہ و لائخی نا اڑاند آتا چیلنج آک جان جوڑی نا آسراتی تا نفاذ اٹ اڑنگ شاغانو۔ اوپارے کہ دا خصوصی دیوان آخبت اٹ دینی مرض آتا توننگ، تیاری و اوفتے تون مون تننگ کن اسہ اومیت اسے۔ اوپارے کہ جہانی ادارہ جان جوڑی نا سروک ٹیڈروس ایڈہینوم گیبریسس ہم داگڑتی تا درشانی ءِ کرینے کہ کوویڈ۔ 19 ءِ تالانی آن توننگ نا گام گیج آتے ٹی شریداری نا کمتی انفیکشن ءِ توننگ و جان تے بچفنگ نا اجتماعی لائخی ٹی اڑاند شاغانے۔ داچرجوئی ٹی او ڈبلیو ٹی او نا فورم آ ملکیت رکھ دانش اٹ رعایت نا مخالفت کروک آ ملک آتیا زور شاغا کہ اوتینا موقف آ نظرشاغر و آخبت اٹ دا بابت معاہدہ نا مخ تفی ءِ کیر۔ اوپارے کہ ساڑی آ حالیت و آخبت اٹ جان تے بچفنگ نا 2 نقطہ نظر نا نیام اٹ پرخ ءِ چٹفنگ نا گرج ءِ۔ اوداڑکن گڑاس المی خاکہ پیش کرے ہرافتے آخبت نا گام گیج یا فریم ورک اٹ اوار کننگے ہرافتے ٹی اونا اصول، مسخت، ازباب و نفاذ نا نیام اٹ اسہ نامیاتی ہم آہنگی نا حامل مننگ، جہانی ہلہلہ ئی جان جوڑی نا حالیت آتے ٹی ایلو امور نا جاگہ غا بریبری نا اصول و مفاد عامہ ءِ اولیت تننگے وخت اس کہ شونداری نا چندی درج، زمواری و لائخی تے مون آ تخسا ریاست آتا حق و زمواری تا نیام اٹ اسہ محتاط توازن اس قائم کرسا پائیدار و جوان فنانسنگ میکانزم اسے اوار کننگے و آخبت اٹ جہانی ادارہ جان جوڑی نا ساڑی آ گورننس و فنانسنگ ماڈل نا مطابقت نا جاچ ءِ ہلنگے۔ پاکستانی سفیر و آخبتی نمائندہ خلیل ہاشمی پارے کہ نن اسہ پورو و جوان ءُ وسیلہ سے آن شُپ جہانی جان جوڑی نا رکھ انا پنجر کن تینا تعلقداری تا بایدے درشانی ءِ کین ہراڑآن آخبت اٹ دینی مرض آتون گچین وڑاٹ مون تننگے و دادہائی نا ایسر اسکان جہانی جان جوڑی نا ہدف نا دوئی کننگ ءِ پک کننگ مرے۔
