اسلام آباد۔ 24 نومبر (اے پی پی) جارج واشنگٹن یونیورسٹی نا طالب علم آک چارشنبے نادے آ پاکستانی سفارت خانہ نا دورہ ءِ کریر، طالب علم آک واشنگٹن ڈی سی ٹی تعینات پاکستانی سفیر ڈاکٹر اسد مجید تون اوڑدہی کریر۔ ڈاکٹر اسد مجید خان طالب علم آتے پاکستان نا تاریخ، دودوربیدگ و خارجہ پالیسی بشمول پاک۔امریکہ ہڑتوم آ کنڈآتا تعلقداری نا بابت سرجم حوال تس۔ سفیر پارے کہ پاکستان متکن انگا تہذیت آتا وارث ءِ ہرافتے ٹی مہرگڑھ ، وادی سندھ و گندھارا تہذیب اوار ءُ۔ پاکستان۔امریکہ ہڑتوم آ کنڈآتا تعلقداری آ سفیر پاکستان ہیت کرسا پارے کہ پاکستان نا امریکہ تون سوگو اقتصادی، دودوربیدگی و تعلیمی رابطہ ءِ۔ اسد مجید پارے کہ پاکستان تینا جوڑ مننگ آن امریکہ نا سنگت و شریدار مسنے۔ پاک۔ امریکہ ہڑتوم آ ملک آک تدوک آ 74 سال اٹی جہانی، جغرافیائی و سیاسی پڑاٹ اہم سرسہبی دوئی کرینو۔ اوپارے کہ پاکستان و امریکہ ، اوغانستان و ڈیہہ ٹی امن و سوگوی خوارہ و دارداٹ ہڑتوم آ ملک آتا نیام اٹ شریداری ءِ۔ اوغانستان آن امریکی پیش تمنگ آن پد پاکستان اوغانستان ءِ اِلنگ ناخواہندار ہزار آ بندغ آتے رکھ ءُ کسر اس تس۔ پاکستانی سفیر پارے کہ پاکستان، اوغانستان اٹی انسانی تنکی ءِ توننگ و اوغانستان و ڈیہہ ٹی امن و سوگوی کن امریکہ تون اوار جہانی ملک و شریدار آتون اواری اٹ کاریم کننگ نا چاری ءِ۔ اوپارے کہ پاکستان امن پسند ءُ ملک اسے و غٹ ملک آک خاص وڑاٹ ہمسایہ غاتون دوستانہ تعلقداری نا خواہندار ءِ۔ کشمیر نا بابت سفیر پارے کہ بھارت مقبوضہ جموںو کشمیر اٹی 05 اگست 2019 ء آ اسہ کنڈی و غیر کانودی گام اس کرینے۔ بھارت نا غیر کانودی کوزہ گیری ٹی جموں و کشمیر اٹی بھارتی ریاستی دہشت گردی، مظلوم کشمیری تیا ظلم و انسانی حق انا پدریسہ خلاف ورزیک سویلی ایشیاٹی اسٹریٹجک چاگڑد ءِ بھس کرینے۔ داوخت آ سفیر پاکستان طالب علم آتا سوج آتا ورندی ءِ ہم تس۔ طالب علم آک پاکستان نا بابت ہیل کننگ و معلومداری سیشن نا اڈتننگ آ نئے بیرہ پاکستان نا سفیر نا ستاءِ کریر بلکن اونا منت واری ءِ ہم ہرفیر۔
