واشنگٹن۔ 24 نومبر (اے پی پی) امریکہ اوغانستان اٹ انسانی تنکی ، دہشت گردی تون مون تننگ و ایلو ویل آتیا طالبان آتون گپ وتران کن بروک آ تُو قطر اٹی دُوارہ مذاکرات بناکیک۔ فرانسیسی خبررساں ادارہ نا رداٹ امریکی وزارت خارجہ نا ترجمان نیڈ پرائس تدوک آ دے بیان اٹی پارے کہ طے مروک ڈٹ انا رداٹ قطر اٹی 2 ہفتہ اسکان برجاسلوک آ مذاکرات اٹ امریکی ڈل انا کماشی ءِ اوغانستان کن امریکہ نا خصوصی نمائندہ ٹام ویسٹ کیک۔ مذاکرات اٹ امریکہ نا اہم قومی مفادات، داعش و القاعدہ نا برخلاف انسداد دہشت گردی آپریشن، انسانی امداد، اوغانستان نا بگڑینگوک آ زرگزران و 20 سال انا اوغان جنگ اٹی امریکہ کن کاریم کروک آ اوغان و امریکی شاری تا اوغانستان آن پیش تمنگ نا رکھ کسر اس کشنگ آ گپ وتران کننگک۔ اوپارے کہ امریکہ طالبان آتون گپ وتران ءِ برجاتخک و فی الحال بیرہ انسانی امداد فراوان کیک۔ یات سلے کہ امریکہ و طالبان آتون 2 دے ئی مذاکرات نا اولیکو ریسہ 9 اکتوبر آ قطر نا دارالحکومت دوحہ ٹی بناکریسس۔
