اقوام متحدہ۔ 23 نومبر (اے پی پی) پاکستان و بحرالکاہل اٹ واقع ملک پالاؤ باضابطہ وڑاٹ سفارتی تعلقداری تا قیام نا معاہدہ غا دستخط کرینو و چندی بشخ آتے ٹی تین پہ تینی فائدہ ٹی کمکاری آ زور شاغانو ۔ دا چرجوئی ٹی نیویارک اٹی اقوام متحدہ ٹی پاکستانی مشن اٹ دود اس اڈ ہلک ہراٹی اقوام متحدہ ٹی پاکستان نا آخبتی مندوب منیر اکرم و پالاؤ نا سفیر الاناسعید معاہدہ غا دستخط کرے۔ ہڑتوم آ سفیر آک داپت انا درشانی ءِ کریر کہ سفارتی تعلقداری تا قیام آن ہڑتوم آ ملک آتا نیام اٹ سیاسی، واپاری، اقتصادی، دودوربیدگی و تعلیم تون اوار تین پہ تینی است خواہی نا چندی بشخ آتے ٹی کمکاری نا پوسکن ءُ کسر ملنگک۔ اواقوام متحدہ و ایلو کثیر الجہتی فورم تیا ہڑتوم آ ملک آتا نیام اٹ ساڑی آ والہانہ و خوشگوار تعلقداری آ ہم است جمی نا درشانی ءِ کرے و کمکاری نا ساڑی آ بشخ آتے گیشتر کرسا دا تعلقداری تے پین سوگو کننگ نا عزم انا درشانی ءِ کرے۔ ہڑتوم آ ملک آتا سفیر آک اسیجائی وڑاٹ اقوام متحدہ نا سیکرٹری جنرل انتونیوگوتریش ءِ پاکستان و پلاؤ نا نیام اٹ سفارتی تعلقداری تا قیام نا بارواٹ معلومدار کریر۔ پاکستان و پالاؤ ایشیاپیسفک پڑک نا ہم باسک آک ءُ و ہڑتوم آ ملک آتا نیام اٹ سفارتی تعلقداری تا قیام آن پائیدار شونداری نا ہدف آتا دوئی کننگ اٹ اسیجائی وڑاٹ کاریم کننگ اٹ کمک رسینگک ہرانا مسخت جہانی شونداری و شونہالی ءِ مون آ دننگ ءِ۔
