اقوام متحدہ۔ 18 نومبر (اے پی پی) اوغانستان کن اقوام متحدہ نا مندوب ڈیبورالیونز خبڑدار کرینے کہ اوغانستان نا زرگزرانی تنکی آن ملک اٹ انتہاپسندی نا خطرہ نا ودنگ نا گڑتی ءِ۔ فرانسیسی خبررساں ادارہ نا رداٹ اوتدوک آ دے اقوام متحدہ نا سلامتی کونسل اٹ پارے کہ ہندی زرگزران بھس مننگ تون اوار اوار نئے بیرہ منشیات و سلہہ و انسانی اسمگلنگ اٹ ودکی نا گمان ءِ بلکن ساڑی حالیت آتیان انتہاپسندی نا خطرہ ٹی ہم ودکی نا ہم گڑتی ءِ۔ اوخبڑدار کرے کہ بینکنگ سیکٹر نا ساڑی آ ژند مالیاتی نظام ملکی زرگزران ءِ غیر منظم غیر رسمی کرنسی نا تبادلہ نا کنڈآ دِکہ ایتک ہرا بیرہ دہشت گردی، اسمگلنگ و منشیات نا پین اسمگلنگ اٹ آسراتی فراوان کننگ کیک و داحالیت آک اول اوغانستان و ولدا ڈیہہ ءِ زہمی کیک۔ اوپارے کہ طالبان اوغانستان اٹ داعش نا تالانی ءِ توننگ اٹ بے سہب مسنے۔ اوداانتباہ تدوک آ دے اوغانستان نا وزیر خارجہ امیر خان متقی نا کنڈآن امریکی کانگریس ءِ نوشتہ کروک آ داچٹھی آن کرے ہراٹی اوغان وزیر خارجہ امریکہ غان اوغانستان نا میرات آتے بحال کننگ نا خواست کرے۔ اوپارے کہ اوغانستان داوخت آ ہرا بھلا چیلنج آتون مون تننگ ءِ او مالی بے رکھی ءِ و داچیلنج ءِ بنداوی سوب امریکی حکومت نا اوغان الس نا میرات آتے منجمد کننگ ءِ۔
