بیجنگ۔ 09 نومبر (اے پی پی) چین اٹی پاکستان نا سفیر معین الحق پارینے کہ پاکستان و چین نا نیام اٹ ہڑتوم آ کنڈآتا واپار نا کچ و چین اکن پاکستانی برآمدات ہڑتوم آک اینخوسال انا ایسر اسکان پوسکن ءُ ریکارڈ اس جوڑ کیرہ۔ اوسے شنبے نادے آ چین نا نیوزچینل چائنا گلوبل ٹیلی ویژن نیٹ ورک (سی جی ٹی این) ءِ تروک آ اسہ انٹرویو اسے ٹی پارے کہ چین پاکستان نا غٹ آن بھلا واپاری شریدار مننگ تون اوار اوار برآمد آتا لحاظ اٹ ارٹ میکو بھلو ملک ہم ارے و خاص وڑاٹ اینخو نا سال انا حساب وکتاب نا رداٹ کورونا نا دین آن پد ہم ننا تین پہ تینی واپار اٹی نمان ودکی مننگ ءِ۔ اوپارے کہ اولیکو 3 سہ مالی ٹی ہڑتوم آ ملک آتا نیام اٹ تین پہ تینی واپار اٹی 60 درسد آن زیات ودکی مسنے و چین ءِ پاکستانی برآمد آتے ٹی 75 درسد ودکی مسنے ہنداخاطرآن ننے اومیت ءِ کہ اینخو سال انا ایسر اسکان ہڑتوم آ کنڈآتا واپار نا کچ و چین اکن پاکستانی برآمد آتا پوسکن آ ریکارڈ جوڑ مریک۔ اوپارے کہ ہڑتوم آ ملک آتا نیام اٹ واپار نا کچ 20 بلین ڈالر ءِ ولے ننے ومیت ءِ اینخو سال دا کچ 25 بلین ڈالر نا کہول اسکان سرمریک وخت اس کہ پاکستان نا برآمد 1.8 بلین ڈالر نا لگ بھگ مسنے ولے نن اومیت کینہ کہ پاکستانی برآمدات اینخو سال 3 بلین ڈالر اسکان سرمریک و ننے لگک کہ نن بروک آ 4 آن 5 سال اٹی دادے اِراہنداخہ پین کننگ کینہ۔ اوچین اکن پاکستانی برآمد آتے پین ودفنگ کن سفارش کرے کہ پاکستان اٹ ٹیکسٹائل و گوازی تا گڑاسوگو انگا بشخ آک ءُ و دااہم ءُ کڑد اس ادا کننگ کیرہ۔ اوپارے کہ پاکستان نا شمار ہمومنہ ملک آتے ٹی مریک ہرافتا ٹیکسٹائل مصنوعات بھاز پنی ءُ ہرافتے ٹی جوڑ کننگ آن ہلیس فنشنگ اسکان ٹیکسٹائل انڈسٹری نا مچ آ ویلیو چین ءِ وخت اس کہ پاکستان فٹ بار تیار کروک آ غٹ آن بھلا ملک ءِ و پاکستانی فٹ بال باضابطہ وڑاٹ فٹ بال ورلڈ کپ اٹ کاریم اٹ اتنگک۔ اوچین و دنیا ٹی پاکستانی مارکیٹ ءِ مون آ دننگ اٹ کمک کن چائنا انٹرنیشنل امپورٹ ایکسپو(سی آئی آئی ای) نا کڑد انا بابت پارے کہ تدوک آ 4 سال اٹی سی آئی آئی ای اسہ بھاز اہم ءُ پلیٹ فارم اس مسنے و او پاکستانی پوریاگر و کاروباری بندغ آتے ۔ دنیا نا غٹ آن بھلا مارکیٹ اٹی تینا مصنوعات آتا نمائش کن موقع فراوان کرینے۔ پاکستان اٹ درملکی زرکاری کن پین وارخواہی تیٹی چین نا کڑد انا بابت اسہ سوج اسے نا ورندی ٹی اوپارے کہ چین پاکستان اقتصادی راہداری (سی پیک) نا ارٹ میکو ریسہ ٹی نن تعلقدار منڈی تے ملانن و پوریاگرآتے پین رسینگ تسونن۔ اوپارے کہ ہڑتوم آ ملک آک اسہ ایلو نا اسہ ہزار آن زیات برآمدی مصنوعات آتے ٹیرف آن مستثنیٰ گوندانو ہرانا نتیجہ ٹی ہڑتوم آ ملک آتا الس ءِ داگڑاتسکان رسینگ اٹ آسانی و آسراتی دوئی مسنے۔ پاکستانی سفیر معین الحق پارے کہ پاکستان آخبت اٹ خذمت آتا بشخ اٹی آجو واپاری معاہدہ غاتے ٹی ودکی و ودفنگ نا خواہندار ءِ انتئے کہ پاکستان و چین ہڑتوم آ تے کن خذمت آتا بشخ اٹی جی ڈی پی نا بھلو بشخ اسے۔ اوپارے کہ کشت وکشار و صنعت نا بشخ زرگزران نا شونداری ٹی تمبہ نا حیثیت تخاکہ ولے داسہ خذمت آتا بشخ زرگزران اٹ مخ انا ملی ءِ ہنداخاطرآن اہم آخبت اٹ چین اتون معاہدہ غاتے ٹی خذمت آتا بشخ ءِ وار کننگ نا خواہندار اُن۔ اوچین پاکستان ہڑتوم آ کنڈآتا اقتصادی واپاری کمکاری ءِپین ودفنگ نا بابت پارے کہ سی پیک نا ارٹ میکو ریسہ ٹی غٹ آن اہم بشخ کشت وکشار نا بشخ خاص وڑاٹ پاکستان اٹ کشت وکشار و سائنس و ٹیکنالوجی نا جدید کاری نا احاطہ کننگانے۔ سی پیک نا جوائنٹ کوآرڈنیشن کمیٹی نا ساڑی ٹی مروک آ دیوان اٹی ہڑتوم آ ملک آک انفارمیشن ٹیکنالوجی ، صنعت، صنعت کاری ٹی کمکاری آن بیدس مچ آ پاکستان اٹ خصوصی اقتصادی زون تا جوڑ کننگ آ اسہ ورکنگ پڑک اس ٹہیفنگ نا فیصلہ کریر۔ پاکستانی سفیر معین الحق پارے کہ نن پاکستان اٹ چینی زرکار و کمپنی تے تینا مینوفیکچرنگ پلانٹس خلنگ نا سلہ خلنگ اُن۔
