اسلام آباد۔ 04 اکتوبر (اے پی پی) وزیراعظم عمران خان پارینے کہ کبینی نا بنداوی سوب درآمدی افراط زر ءِ، بدبختی اٹ ننا ملک انا نظام اشرافیہ کن ءِ، انصاف، تعلیم، وام اتون اوار غٹ آسراتیک امراء و اشرافیہ کن ئسر، خواجہ محمد صلی اللہ علیہ وآلہ وسلم اول آسودہی ریاست ءِ جوڑ کرے ولدا شونہالی بس، مستین اٹ تینا کروک آ داتصور غلط ئس کہ اول پیسہ برے و ولدا آسودہی ریاست ءِ جوڑ کینہ، انسانیت و انصاف سولائزیشن نا بنداو آک ءُ، جہانی کہول آ تیل انا نہاد آتے ٹی سد درسد ودکی مس ولے نن لیوی و سیلز خراج اٹ 400 ارب روپئی سالانہ نا نسخان ءِ سگسا بیرہ 22 درسد ودکی کرین، نہاد آتے ٹی ودکی ناننے احساس ارے ہنداخاطرآن بروک آ دے تیٹی نزور تپہ غاتے ٹارگٹڈ سبسڈی تننگ والااُن۔ اودوشنبے نادے آ داڑے سرسہب پاکستان پروگرام نا بناءِ کننگ نا وخت آ اڈہلوک آ دود آن تران کریکہ۔ داوخت آ وزیر خزانہ شوکت ترین، وزیراعظم نا خصوصی کمکار امور نوجوانان عثمان ڈار، چیئرمین پاکستان ہاؤسنگ اتھارٹی لیفٹیننٹ جنرل (ر) انور علی حیدر ئسک ہم تران کریر۔ وزیراعظم وزیرخزانہ شوکت ترین و اونا ٹیم ءِ سرسہب پاکستان پروگرام نا بناآ مبارکبادی ترسا پارے کہ داپروگرام 74 سال بایدے مہالو بناکروسس، ننا دا سوچ غلط ئس کہ اول پیسہ برے وولدا آسودہی ریاست اس جوڑ کینہ۔ وزیراعظم پارے کہ مدینہ نا ریاست نا ہیت ءِ نن دنیا نا سرسہب انگا ماڈل نا سوب آن کینہ، داتاریخ نا بشخ اسے، دااسہ حقیقت و تاریخ اسے کہ اسہ ہندن ءُ تہذیب اس ہرانا ہچ ءُ حیثیت اس الوکہ او دنیا نا امام جوڑ مس۔ وزیراعظم پارے کہ خواجہ صلی اللہ علیہ و آلہ وسلم نا سنت و شریعت نا پیروی نا پرمان الہٰی ننا جوانی کن ءِ، اگہ نن دادے تینا کینہ تو ننا تینا کڑد جوان مریک۔ وزیراعظم پارے کہ مدینہ ٹی اول آسودہی ریاست ءِ جوڑ کننگا و ولدا شونہالی بس۔ اوپارے کہ چین وہندوستان مسہ چاردہائی مست بریبر ئسر ولے اینو چین بھارت نا مقابلہ ٹی شونداری نا کسر آ بھاز مون آ ہنانے، چین مدینہ نا ماڈل ءِ تینا کرے، تینا نزور تپہ غاتے بڑزآ ہرفے، نیزگاری ءِ چٹفے، اومخلوق کن مریس مدتی پروگرام کرے، چین اخس کہ آبادی نیزگاری آن کشا اونا دنیا ٹی درور ملیپک۔ وزیراعظم پارے کہ ننے بے مٹ ءُ اسلامی آسودہی ریاست اس جوڑ کننگ کن ہرابنداوی اصول آتے اختیار کروئی ئسک اوکنڈآ چکار کتون، بدبختی اٹ ننا ملک اسہ خاص ءُ اشرافیہ سے نا ملک جوڑ مس، ننا نظام تعلیم اٹ اسہ خاص ءُ تپہ سے کن وارخواہی ئس، نن اسہ اسہ وڑ ءُ نصاب تعلیم اس اتنگ اُن، اوڑآ تنقید کروک آک شرم کیر، انصاف، تعلیم، وام، جان جوڑی نا آسراتی غٹ اشرافیہ کن ئسر۔ وزیراعظم پارے کہ 1700 ء ٹی ہندوستان نا جی ڈی پی 24 درسد ئس، ہموڑے امراء و لس بندغ نا زند انا آب اٹ پیدوار پرخ ئس، ہزگار تا جزیرہ و نیزگار تا سمندر تون اسہ راج اس ہم سرسہب مننگ کپک۔ وزیراعظم پارے کہ ننا کوشست ءِ کہ تینا نیامی تپہ ءِ بڑزااتین، اوفتے کن ہاؤسنگ نا بشخ اٹ فنانسنگ اٹ مشکل آتے مر کین، کمرشل بینک آتون انفراسٹرکچر و تربیت نا کمتی نا سوب آن نن وزیرخزانہ شوکت ترین نا مائیکرو فنانس نا تصور آن امنا کرین۔ وزیراعظم پارے کہ سرسہب پاکستان پروگرام اسہ مزل نا نشان اس مریک۔ لس بندغ نا زند ءِ گچین کننگ کن گام گیج آتیان برکت بریک، شوکت خانم کینسر ہسپتال جوڑ کننگ نا مسخت غریب بندغ ءِ درمان نا مفت آسراتی نا فراوان کننگ ئس، ہمووخت آ ننے پاننگاکہ اگہ پنچ درسد آن زیات غریب ناجوڑ آتا مفت درمان ءِ کننگاتو ہسپتال بند مریک، نن 70 درسد ناجوڑ آتا مفت درمان نا بناءِ کرین، ہرہنوک آ سال ننے پاکستانی تا کنڈآن ملوک آ عطیہ غاتے ٹی ودکی مس، ہرسال 9 ارب روپئی مفت درمان آ خڑچ مننگ ءِ، دااللہ نا برکت ءِ، غریب نا دعاءِ اللہ بِنک۔ نن مستین اٹ نزور و نیزگار تپہ کن سجفتون، حکومت نظام اشرافیہ کن جوڑ مسنے، اودے بدل کننگ آ مزاحمت مریک۔ وزیراعظم پارے کہ سرسہب پاکستان پروگرام اٹ بروک آ ویل آتا مانیٹرنگ کن بایدے نظام اس مرے۔ وزیراعظم پارے کہ حکومت نیزگاری تون مون تننگ کن پورو وڑاٹ کوشست کننگ ءِ، دنیا ٹی پٹرولیم مصنوعات آتا نہاد آتے ٹی 100 درسد ودکی مس وخت اس کہ نن 22 درسد ودکی کرین، ہراملک آتے ٹی تیل انا پیدوار ارے اوفتیان بیدس تیل درآمد کروک آ ملک آتے ٹی پٹرولیم مصنوعات اٹی غٹ آن کم ودکی نن کرین، خولم اٹ دنیا ٹی 37 درسد ودکی مس، نن بیرہ 12 درسد ودکی کرین، دنیا ٹی بورہ نا نہاد اٹی 40 درسد وخت اس کہ نن 21 درسد ودکی کرین،م وام تیان پد ہم نن نزور تپہ غاتیا کم آن کم بھاریم شاغان، پٹرولیم مصنوعات آتیا سیلز خراج و لیوی ٹی کمتی کرین، داڑآن سالانہ 400 ارب روپئی نسخان ءِ سگان، دانا مقابلہ ٹی ہندوستان سیلز خراج و لیوی ٹی کمتی کتو۔ وزیراعظم پارے کہ ننے نہاد آتے ٹی ودکی نا احساس ارے۔ بروک آ دے تیٹی ٹارگٹڈ سبسڈی اتنگ اُن ہرانا رداٹ کنوئی آ گڑاتیا 40 درسد سبسڈی ایتنہ۔ وزیراعظم پارے کہ نن 70 درسد سی درآمد کینہ، درآمدی افراط زر انا سوب آن کبینی ءِ۔
