اسلام آباد۔ 04 اکتوبر (اے پی پی) صدر مملکت ڈاکٹر عارف علوی پارینے کہ سازگار کاروباری چاگڑد اس فراوان کننگ کن گام گیج کننگ انگءِ تانکہ ملک اٹ درملکی زرکاری ءِ اتنگ مرے، حکومت نا کنڈآن کاروباراٹ آسانی ءِ گچین کننگ کن بناکروک آ اصلاحات نا نتیجہ دوئی مسنے و جہانی درجہ بندی ٹی پاکستان نا رینک 136 می پوزیشن آن گچین مرسا 108 می نمبر آ بسنے۔ اوداخیال آتا درشانی ءِ کوئٹہ چیمبرآف کامرس اینڈ انڈسٹری نا اسہ ڈل اسے تون گپ وتران کرسا کرے۔ ڈل صدر چیمبرفداحسین دشتی نا سرکڑدہ ئی ٹی دوشنبے نادے آ داڑے ایوان صدر اٹ اوڑتون اوڑدہی کرے۔ ڈل اتون گپ وتران کرسا صدر مملکت پارے کہ حکومت کاروبار و صنعتی بشخ آتا آسراتی و سوگوی آ چکار کننگ ءِ وداچرجوئی ٹی پوریاگر برادری و راج انا ایلو نزور تپہ غاتے زیات آن زیات ریلیف فراوان کرینے۔ اوداہیت ءِ مون آ تخا کہ حکومت سرسہب ورناپروگرام نا رداٹ ملک اٹ انٹرپرینیور شپ و چنکا و نیامی درجہ نا کاروباری ادارہ غاتے مون آ دننگ کن 100 ارب روپئی جتا کرینے و ورناتے آسان شڑت آتیا کاروباری وام تننگ ءِ۔ ڈل صدر ءِ قومی زرگزرنا اٹ کوئٹہ نا کاروباری برادری نا کڑد و مون تروک آ ویل آتیان معلومدار کرے۔ صدر ڈل ءِ باور کرفے کہ اوفتا ویل آتا ایسری ٹی کمک کننگک۔
