فارورڈ کہوٹہ۔ 13جولائی (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ بھارت تون ہیت مریک تو اول کشمیر آ مریک، عمران خان مچ آ دنیا ٹی کشمیرنا ویل ءِ گچین وڑاٹ پیش کرے، کشمیراٹی جان جوڑی، تعلیم، مواصلات نا پوسکن آ آسراتی تا فراوانی نا قول ءِ پورو کیک، مستین نا حکمرانک لٹ وپل آن بیدس ہچ اس کتور، مسہ مسہ واری ہلنگ آن پد ہم پارہ کہ ننے موقع ایتبو، کشمیر اٹی نظریہ نا سیاست بناکرینے۔ کشمیری برادری ازم انا سیاست ءِ چٹفینے۔ او سے شنبے نادے آ فارورڈ کہوٹہ ٹی السی جلسہ غان تران کریکہ۔ اوپارے کہ ننا باوہ و پیرہ قربانی ترسا اسہ آجو ملک اس جوڑ کریر ولے کرپٹ حکمرانک وام ہلسا او ملک ءِ وامدار کریر۔ اوپارے کہ اینو ولدا اوپاننگ ءُ کہ ننے موقع ایتبو، مسہ، مسہ وار اوفتے موقع ملانے و اوفک ہچ اس کتور۔ اوپارے کہ پاکستان پیپلزپارٹی سندھ اٹی ہچ اس کتنے، تھراٹی چناک بین آن کہینگ ءُ، روشنائی تا شار کراچی ءِ تہاری ٹی ڈبیفنگا۔ اوپارے کہ پیپلزپارٹی مچ آ سندھ ءِ خلک وداسہ ہم پاہک کہ بھٹو زندہ ءِ۔ اوپارے کہ سلامتی کونسل کشمیری تا حق اٹ قرارداد اس منظور کرے ولے بھٹو پارے کہ داننا جندانا ویل اسے۔ اوپارے کہ مریم نواز ہراداڑے پارسا کننگ ءِ کہ او کشمیرنا مسڑ ءِ، اونا جماعت داڑے قول آتیان بیدس ہچ اس کتو۔ علی امین گنڈاپور پارے کہ بھارت تون اگہ ہیت مریک تو اول کشمیرآمریک، عمران خان سلامتی کونسل اٹ پبی وڑاٹ پارے کہ کشمیرنا ویل انا ایسرالمی ءِ، ہڑتوم آ ایٹمی ءُ ملک ءُ، و جھیڑہ نا حالیت اٹ بھسکاری ڈیہہ ٹی آخا مچ آ دنیا ٹی مریک۔ اوپارے کہ گلگت بلتستان اٹی ننا حکومت ارب آ روپئی نا شونداری کاریم کرفنگ ءِ و کنا قول ءِ کہ کشمیراٹی ہم ننا حکومت مس تو نن داڑے ہمووڑ شونداری کاریم کرفنہ۔ اوپارے کہ آزاد کشمیر اٹی نظریہ نا سیاست بناکرینے و داجاگہ نا الس برادری ازم ءِ چٹفینے۔ بنجائی وزیر پارے کہ نن ہراقول ءِ کینہ، اودے پورو کینہ۔ بنجائی وزیرپارے کہ او مچ آ علاقہ نا دورہ ءِ کرے۔ داڑے سیل و سوات نا شونداری نا بھلو وارخواہی اس ارے، سیل و سواتی ہند آتے تفنگک تانکہ سیل و سوات ءِ مون آ دننگ و ہندی مخلوق ءِ روزگار ملے۔
