میزبان ٹیم ءِ گرین شرٹ انا برخلاف سیریز اٹی 1-0 نا برتری دوئی
ساؤتھ ہیمپٹن۔ 19 اگست (اے پی پی) انگلینڈ و پاکستان نا کرکٹ ٹیم تا نیام اٹ مسہ ٹیسٹ میچ آتیا تالان سیریز نا مسٹ میکو و آخیریکو ٹیسٹ میچ 21 اگست آن روز باؤل، ساؤتھ ہیمپٹن اٹ بناکیک۔ انگلینڈ نا ٹیم ءِ پاکستان نا برخلاف مسہ میچ آتا سیریز اٹی 1-0 نا برتری دوئی ءِ۔ میزبان ٹیم گرین شرٹس ءِ اولیکو ٹیسٹ میچ اٹ 3 وکٹ آتے اٹ شکست تسوسس وخت اس کہ ہڑتوم آ ٹیم تا نیام اٹ مروک آ ارٹ میکو ٹیسٹ میچ کٹنگ وباتننگ نا فیصلہ غان بیدس چٹاسس۔ انگلینڈ ٹیم انا کماشی ءِ جوروٹ کیک وخت اس کہ پاکستان نا ٹیم اظہر علی نا کماشی ٹی میدان اٹ دڑنگک۔ پاکستان ٹیم ءِ سیریز بیربر کننگ کن آخیریکو ٹیسٹ ءِ کٹنگ المی مریک وخت اس کہ انگلش ٹیم ءِ سیریز ءِ کٹنگ کن آخیریکو ٹیسٹ کم از کم ڈرا گوازی کروئی مریک۔ ہڑتوم آ ٹیم تا کیپٹن آک سیریز نا آخیریکو میچ اٹ سرسہبی کن بیان تسنو۔ دااعتبار اٹ گمان کننگ انگ ءِ کہ ٹیسٹ سیریز نا مسٹ میکو و آخیریکو میچ سخت و کانٹے دار مریک۔ داکان مست میزبان ٹیم کالی آندھی ءِ مسہ ٹیسٹ میچ آتا سیریز اٹ 2-1اٹ شسکت تسوسس۔ یات سلے کہ ٹیسٹ سیریز پورو مننگ آن پد ہڑتوم آ ٹیمک سیڈول اٹ اوار مسہ ٹی 20 میچ کننگ کن اسہ وار ولدا اولڈ ٹریفورڈمانچسٹر نا پلو ءِ ہلیرہ ہراڑے مسہ ٹی ٹونٹی میچ آتا سیریز نا اولیکو میچ 28 اگست آ ارٹ میکو میچ 30 اگست آ وخت اس کہ مسٹ میکو و آخیریکو ٹی ٹونٹی میچ یکم ستمبر آ گوازی کننگک۔ ہڑتوم آ ٹیم تا نیام اٹ مسہ ٹی ٹونٹی میچ آتا سیریز نا ہرمسٹ آ میچ اولڈ ٹریفورڈ، مانچسٹر اٹ گوازی کننگرہ۔
