حکومت برآمد کنندگان آتے مون تروک ویل آتا ایسر، کاروبار کننگ نا خڑچ اٹی کمتی و جہانی منڈی تسکان رسینگ کن تعلقدار وزارت، محکمہ و نجی بشخ اتون رابطہ ٹی ءِ، جام کمال خان

اسلام آباد۔ 22اکتوبر (اے پی پی)بنجائی وزیرواپارجام کمال خان پارینے کہ حکومت برآمد کنندگان آتے مون تروک ویل آتا ایسری، کاروبارکننگ نا خڑچ اٹی کمتی و جہانی منڈی تسکان رسینگ ءِ ودفنگ کن تعلقدار وزارت ، محکمہ و نجی بشخ آتون پدریسہ رابطہ ٹی ءِ۔ دارداٹ برآمد آتا مسابقتی لائخی ءِ گچین کننگ کن عملی گام گیج آتیا کاریم برجاءِ۔ دا خیال آتا درشانی ءِ او وزارت واپاراٹی برآمدکنندگان وبڑزکو سرکاریکمامدارآتون ارٹ میکو بڑزکو کہولی سلابتی دیوان نا کماشی ءِ کرسا کرے ، ہراٹی پاکستان نا برآمد آتے زہمی کروک آ ویل و اوفتا ایسری کن تعلقدار سرکاریمحکمہ غاتا کنڈآن کننگوک آ پیش رفت نا جاچ ءِ ہلنگا۔ دیوان اٹی وزیر مملکت خزانہ و محصولات بلال اظہر کیانی، وزارت واپار نا سینئرکمامدارو تعلقدار وزارت محکمہ غاتا نمائندہ غاک بشخ ہلکر ، وخت اس کہ سرکڑدہ برآمد کنندگان آک بالمشافہ و آن لائن بشخ ہلکر ، توانائی نا خڑچ ، خراج ، مالی کمکاری ، ضابطہ جاتی وڑوڈول ، برآمدیآسراتی و جہانی منڈی تسکان رسینگ تون اوار اہم امورتیا شرہ مس ۔ دا وخت آتدوک آ دیوان اٹی برآمدکنندگان آتا کنڈآن چست کروک آ ویل و تعلقدار سرکاری ادارہ غاتا ورندی تیا تالان جوان جاچ اس پیش کننگا ہراٹی زیر التو باندات، پیش رفت و پین پالیسی گام گیج آتا گرج انا تعین ءِ کننگا۔ بنجائی وزیر جام کمال خان پارے کہ پاکستان چین، سویلی کوریا، ترکیہ، جاپان و ویتنام تون اوار اہم واپاری شریدارآتون اولیتی واپاری آسراتی تیٹی گچینی کن کوشست کننگ ءِ۔ اوپارے کہ چین اتون ٹیرف رعایت آتیٹی ودکی کن گپ وتران برجاءِ وخت اس کہ سویلی کوریاتون اولیتی واپاری بست وبند آتیاہم پیش رفت مننگ ءِ، ایلو ملک آتون رابطہ سفارتی مشن، واپاری دفتر و ہڑتوم آ کنڈآتا سلابت نا کمک اٹ برجاءِ۔ ترکیہ ٹی پاکستانی ٹیر تا برآمد آتے مون تروک ویل آتا بابت دیوان ءِ پاننگاکہ ٹیر تا گڑاس وڑتے ہڑتوم آ کنڈآتا اولیتی واپاری معاہدہ نا رداٹ رعایت دوئی ءِ، برآمد کنندگان آتے پاننگاکہ او تعلقدار گڑاتا سرجم و ایچ ایس کوڈز فراوان کیر تانکہ ایلو سلوک آ ویل آتے ترکیہ نا کمامدارآتون ہرفنگ مرے۔ دیوان اٹی صنعتی بشخ اکن توانائی نا خڑچ خاص کر گیس لیوی نا اثرآتا جاچ ءِ ہلنگا۔