مزن وزیر محمد شہباز شریف ءُ مالدیپ ءِ صدر ڈاکٹر محمد معیزو ءَ گند ءُ نند کت ءُ ڈل ءِ تک ءَ گپ ءُ تران کت، اقتصادی، تجارتی ءُ سفارتی سیادی ءَ را نوکیں بالاد ءَ سر کنگ ءُ وت مہ وتی بھروسہ ءُ کمک ءِ نوکیں راہ پچ کنگ ءِ وتی جزم ءِ  درشان

اسلام آباد۔21اکتوبر  (اے پی پی): پاکستان ءُ مالدیپ ءِ نیام ءَ اقتصادی، تجارتی ءُ سفارتی سیادی ءَ را نوکیں بالاد ءَ سر کنگ ءُ یکے دومی ءِ سر ءَ بھروسہ ءُ کمک ءِ نوکیں راہ پچ کنگ ءِ وتی جزم ءِ پدا زور داتگ وھدیکہ مزن وزیر محمد شہباز شریف ءَ مالدیپ ءِ صدر ڈاکٹر محمد معیزو ءِ سرکاری تر ءُ تاب ءَ را یک ھاسیں گامگیج ءِ نام داتگ۔ ملکاں چہ دیم ءَ اتکگ ءُ پاکستان ءَ را مالدیپ ءِ راجی دیمروئی ءِ اولویت آنی حمایت ءَ برجاہ دارگ ءِ دل یکیمی داتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءُ مالدیپ ءِ صدر ڈاکٹر محمد معیزو ءِ نیام ءَ مزن وزیر گس اسلام آباد ءَ گند ءُ نند بوتگ۔ ایشی ءَ چہ پد دوئیں ملک آنی نیام ءَ مزن تک ءِ گند ءُ نند کنگ بوت۔ مزن وزیر شہباز شریف ءَ مالدیپ ءِ صدر ءِ مزن وزیر گس ءَ سر بوھگ ءِ سر ءَ آئی ءَ را وش اتک کت ءُ آئی ءِ شرپ ءَ گارڈ آف آنر ءِ مراگش برجم دارگ بوت۔ صدر موئی ءَ گارڈ آف آنر ءِ چار ءُ تپاسی کت ءُ مزن وزیر گس ءَ یادگار ءِ رنگ ءَ یک پودے ءِ ھم ایر کت۔ گپ ءُ تران ءِ ساھت ءَ دوئیں راہشوناں پاکستان ءُ مالدیپ ءِ وت مہ وتی سیادیانی سر ءَ چار ءُ تپاسی کتگ ءُ دمگی ءُ جھان ءِ جیڈھ آنی سر ءَ ھیال ریچی کتگ ۔ مزن وزیر شہباز شریف ءَ مالدیپ ءِ گوما دیریں براتی سیادی ءَ را گیش مھکم کنگ ءُ آئی ءِ راجی دیمروئی ءِ اولویت آنی تہ ءَ کمک ءَ را برجاہ دارگ ءِ واستہ وتی جزم ءِ پدا زور دات۔ گپ ءُ تران ءِ تہ اقتصادی کمک ءَ را حاصیں ارزشت دیگ بوت۔ دوئیں رہشون آں دو نیمگی تجارت، سرمایہ کاری، سیل ءُ سواد، فوڈ سیکیورٹی، دوا ءُ نجی شعبہ ءِ شریکداری ءَ را گیش کنگ ءِ سرا تپاک کتگ۔ دوئیں بامرد آں ھوائی ءُ دریائی رابطہ ءَ را گہتر کنگ ءُ زوتاں چہ زوت یکجائی اقتصادی کمیشن ءِ دیوان ءِ گوانک جنگ ءِ ضلورت ءِ سر ءَ زور پر دات۔ مزن وزیر ءُ مالدیپ ءِ صدر ءَ آیوکیں دو سال آنی تہ ءَ دو نیمگی تجارت ءَ را انوگیں 13.4ملین ڈالر ءَ چہ 200ملین ڈالر ءَ سر کنگ ءِ ٹارگٹ ایر کتگ۔ مزن وزیر ءَ مالدیپ ءَ را المی ئیں وردن ءُ وراک ءُ درمان آنی پھجارینگ ءِ واستہ پاکستان ءِ تیاری ءِ سر ءَ زور پر دات۔ آئی ءَ گوشت کہ اے شق دوئیں حکومت آنی نیام ءَ براہ راست بندوبست ءِ وسیلگ ءَ ممکن جوڑ کنگ بیت۔ مزن وزیر ءَ ہر سال مالدیپ ءِ نودربر آنی واستہ 20 گیش انڈرگریجویٹ اسکالرشپ ءِ جار جتگ۔ آئی ءَ جان سلامتی ءِ شوبگ، پیشہ وارانہ تربیت ءُ ادارگ آنی گنجائش سازی ءِ تہ ءَ کمک ءِ واستہ پاکستان ءِ جزم ءِ ھم پدر کت۔ مالدیپ ءِ صدر ءِ ’’پنچ ملین درچک ءِ کشت ءُ کشار ءِ گامگیج‘‘ ءِ چیر دستی ءَ مزن وزیر ءَ جار جتگ کہ پاکستان آیوکیں 12ماہ آنی تہ ءَ یک لکھ زیتون ءِ پودگ ءُ جتا جتائیں پودگ آنی یک لکھ ءِ دان ءِ پجارینگ ءَ کنت، ایشی ءِ سپلائی موسمی دستیابی ءِ رد ءَ کنگ بیت۔ پاکستان وتی ماہریناں مالدیپ ءَ روان دنت کہ آ اودا پلانٹ نرسری ءِ جوڑ کنگ ءَ کمک کن انت۔ اے کمک ءَ چہ سئے سال ءِ تہ ءَ کل ءَ یک ملین پودے ءِ پیداوار ءَ کمک رسیت۔ دوئیں رہشوناں دمگی ءُ جھان ءِ جیڈھ آنی سر ءَ تران کنان ءَ امن، گپ ءُ تران، حاکمیت ءِ احترام ءُ میاں اوستمانی کانود ءِ سر ءَ عمل کنگ ءِ واستہ وتی جزم ءِ پدا زور دات۔ مزن وزیر ءَ فلسطین ءِ جیڈھ ءِ سر ءَ مالدیپ ءِ اصولی موقف ءِ ساڑات۔ آئی ءَ جموں ءُ کشمیر ءِ جیڈھ، سندھ ءِ آپانی معاہدہ ءُ دمگی ایمنی ءِ جاور ھال ءِ ھوالگ ءَ پاکستان ءِ موقف ھم پیش کتگ۔ دوئیں رہشون آں جتا جتائیں شوبگ آنی تہ ءَ کمک ءِ واستہ 20 مفاہمت نامہ ءِ بدلی ءِ گواہ بوت۔ اے مفاہمت نامہ ءِ تہ ءَ جان سلامتی، وانگ ءُ زانگ، تکنیکی تربیت، سیل ءُ سواد، سول ایوی ایشن، کشت ءُ کشاری، ماہی گیری، دفاع، دریائی سلامتی، کانود ءِ نفاذ ءِ ادارگ، سول سروس، چاگردی سلامتی، دود ءُ ربیدگ ءُ ورنا ھواریں پڑ آنی تہ ءَ ھوار اَنت۔ یکجائی میڈیا گپ ءُ تران ءِ ساھت ءَ دوئیں بامرد آں گند ءُ نند ءِ آسر ءِ سر ءَ دل یکیمی ءِ درشان کت ءُ اے گپ ءِ سر ءَ زور پر دات کہ منّگ آنی وھد ءُ پاس ءِ سر ءَ عمل کنگ ءَ را دل یکیمی کنگ بہ بیت تانکہ دوئیں ملک آنی اُلس ءَ را عملی آسراتی رس ایت۔ یک ھاسیں مراگشے ءِ تہ ءَ میاں اوستمانی اسلامی یونیورسٹی اسلام آباد ءَ مالدیپ ءِ صدر ڈاکٹر محمد معیزو ءَ را سیاست ءُ میاں اوستمانی سیادی ءِ پڑ ءَ اعزازی پی ایچ ڈی ءِ ڈگری داتگ۔ اے ڈگری آئی ءِ سروکی، سرکاری ھزمت ءُ مالدیپ ءِ دیمروئی ءِ تہ ءَ وتی کرد ءِ ستا ءَ دیگ بوتگ۔ مزن وزیر شہباز شریف ءَ مالدیپ ءِ صدر ءُ آئی ءِ ڈل ءِ شرپ ءَ نان ءِ ورگ ءِ ھم میزبانی کت۔ مالدیپ ءِ صدر ءِ اے سرکاری تر ءُ تاب گوستگیں 11سال آنی تہ ءَ مالدیپ ءِ صدر ءِ پاکستان ءِ اولی تر ءُ تاب اِنت۔ اے تر ءُ تاب پاکستان ءُ مالدیپ ءِ نیام ءَ سفارتی سیادی ءِ برجائی ءِ 60 سال سرجم بوھگ ءِ موہ ءَ بوھگ ءَ انت کہ اے دوئیں ملک آنی نیام ءَ سیادی ءَ را گیش مھکم، پراھ ءُ شاھگان ءُ وت مہ وتی سیت مند جوڑ کنگ ءِ ھاترا ھاسیں گامگیج انت۔