لندن۔ 03 اگست(اے پی پی) انگلینڈ پاکستان نا برخلاف مسہ ٹیسٹ میچ آتیا تالان سیریز نا اولیکو میچ اکن 14 باسکی ٹیم انا پڑو ءِ کرینے۔ ویسٹ انڈیز نا برخلاف سیریز اٹ کٹوک آ ٹیم اٹ ہچ ءُ بدلی اس کننگتنے۔ انگلینڈ و پاکستان نا کرکٹ ٹیم تا نیام اٹ مسہ ٹیسٹ میچ آتا سیریز نا اولیکو میچ 5 اگست آن امارات اولڈ ٹریفور، مانچسٹر اٹ بناکیک۔ انگلینڈ ٹیم انا کماشیءِ جوروٹ کیک۔ ویسٹ انڈیز نا برخلاف سیریز اٹ کٹوک آ انگش ٹیم انا سپنر ڈومینک بیس ءِ ٹیم اٹ برقرار تخنگانے۔ انگلینڈ نا 14 باسکی ٹیسٹ سکواڈ اٹ جوروٹ ٹیم انا کماشی ءِ کیک وخت اس کہ ایلو گوازی گرتیٹی بین سٹوکس، کرس ووکس، مارک ووڈ، جیمز اینڈ رسن، جوفراآرچر، ڈومینک بیس، سٹورٹ براڈ، روری برنز، جوس بٹلر، زیک کرولے، ثام کیرن، اولی پوپ و ڈوم سیبلے اوار ءُ۔ پاکستان نا برخلاف مسہ ٹیسٹ میچ آتا سیریز آن مست انگلینڈ نا ٹیم امارات اولڈ ٹریفور آ سرمسنے۔
