اسلام آباد۔ 07 جولائی (اے پی پی) بنجائی وزیر بحری امور علی حیدر زیدی سندھ حکومت نا کنڈآن عذیر بلوچ و نثار مورائی نا جے آئی ٹی رپورٹ آتے ٹی ردوبدل آ چیف جسٹس آف پاکستان آن سوموٹو نوٹس ہلنگ نا خواست کرینے۔ بنجائی وزیر حوالکاری و شینکاری سینیٹر شبلی فراز تون اوار پریس انفارمیشن ڈیپارٹمنٹ اٹ پریس کانفرنس آن تران کرسا اوپارے کہ دنیا ٹی رائٹ و لیفٹ انا سیاست مریک وخت اس کہ داڑے رائٹ و رانگ نا سیاست مننگ ءِ۔ اوپارے کہ ای جے آئی ٹی رپورٹ آتے مون آ اتنگ کن بھلو جہد اس کرینٹ، داسہ سندھ حکومت اللہ اللہ کرسا دارپورٹ آتے پبلک کرینے۔ اوپارے کہ دوبہ دار جے آئی ٹی رپورٹ اٹی 158 خون ءِ تینٹ امنا کرینے۔ اوپارے کہ سندھ حکومت ہراجے آئی ٹی رپورٹ ءِ ریلیزکرینے او پورو اف۔ جے آئی ٹی ٹی ہراپت آتے پاش کننگاسس اوٹی داپاننگتنے کہ دوبہ دار دِنا پاننگ آ دافتے کرے و دافتا دیر ءِ فائدہ مس۔ اوپارے کہ نن بھلو مرغن ءُ جہد اسے آن پد اقتدار اٹی بسن، عمران خان نا مہروانی اٹ وزیر ہم مسن، نن ملک ءِ بدل کننگ کن بسونن، ملک ءِ سہی کسر آ اتنگ کن المی ءِ کہ اللہ نا نظام ہرا سزا وجزا غا تالان ءِ اوڑآ عمل کننگے۔ علی زیدی پارے کہ عذیر بلوچ تینا بیان حلفی ٹی دا اقرار کرے کہ او سینیٹر یوسف بلوچ نا پاننگ آ وزیراعلیٰ سندھ قائم علی شاہ و فریال تالپور تون ملا و تینا برخلاف ہیڈ منی ءِ چٹفنگ نا پارے ہرادے فریال تالپور و آصف زرداری نا پاننگ آ چٹفنگا۔ علی زیدی پارے کہ جے آئی ٹی رپورٹ نا آخیریکو پنہ غا بیان حلفی ٹی عذیر بلوچ پارے کہ کنے گڑتی ءِ دا پت آتا پاش مننگ آن پد کنے و کنا اُراوالا تے خلنگک ہراڑکن ای درخواست کیوہ کہ پورو رکھ ءِ کننگے انتئے کہ کنے آصف زرداری و ایلو سیاسی مخلوق بشمول ہرافتا ذکر بیان اٹی ءِ اوفتیان انتقامی کارروائی نا خطرہ ءِ ۔ علی زیدی نا پاننگ ئس کہ بلدیہ فیکٹری نا جے آئی ٹی ءِ ہم بھاز مشکل اٹ جاری کننگا، جے آئی ٹی ٹی پاننگانے کہ ہراوڑ ادارہ غاتے بھس کننگا۔ اوپرے کہ سندھ پولیس نا ایس پی ڈاکٹر رضوان احمد رپورٹ ءِ کشاتو اونا ٹرانسفر ءِ شکار پور آ کننگا۔ اوہموڑے ایلو رپورٹ ءِ کشا، علی زیدی پارے کہ ڈاکٹر رضوان احمد چنیسر گوٹھ محمود آباد ہراکہ کنا حلقہ گچین کاری ءِ، نا بارواٹی تینا رپورٹ اٹی پارے کہ داڑے فرحان غنی پنی ءُ بندغ اس منشیات فروش آتا کمک ءِ کیک و او سندھ انا صوبائی وزیر سعید غنی نا ایلم ءِ۔ اوپارے کہ دا رپورٹ آن پد ڈاکٹر رضوان احمد ءِ فارغ کننگا، ٹرانسفر کننگا۔ علی زیدی پارے کہ جے آئی ٹی رپورٹ آتے کن ای 2017ء ٹی چیف سیکرٹری سندھ ءِ چھٹی اس نوشتہ کریٹ ولے ورندی ءِ تننگتو، اوکان پد دُوارہ چھٹی اس نوشتہ کریٹ ولے ورندی ملتو، اوکان پد ای سندھ ہائی کورٹ اٹ پٹیشن فائل کریٹ، اکتوبر 2017ء آن دا کیس چلینگسا کرے۔ آخرکار 28 جنوری 2020ء ٹی سندھ ہائی کورٹ نا کنڈآن کنا حق اٹی فیصلہ بس ولے سندھ حکومت کنا بارواٹی اعتراض کرے کہ دا معاملہ ٹی کناتو اسہ بندغ اس ہم کستنے تو ای دا رپورٹ ءِ انت اکن خواہنگ اُٹ۔ علی زیدی پارے کہ کنا شار انا الس عمران خان نا پن آ کنے وونٹ تس تو ای سوچاٹ کہ ہیت داسہ داوڑچٹپک ای اسمبلی ٹی داڑا ہیت کریٹ۔
