اسلام آباد۔ 19 مئی (اے پی پی) نائب وزیراعظم و وزیرخارجہ سینیٹر محمد اسحاق ڈار ، چین نا وزیرخارجہ وانگ یی نا سلہ غا دوشنبے نادے آ چین نا مسہ دے ئی دورہ غا بیجنگ آ روانہ مس۔ ترجمان دفترخارجہ نا کنڈآن جاری بیان نا رداٹ محمد اسحاق ڈار چینی وزیر خارجہ وانگ یی اتون اوار اوار چینی کمیونسٹ پارٹی نا اہم باسک آتون اوار ایلو سینئر چینی راہشون آتون سرجمی اٹ گپ وتران کیک۔ اوڑدہی تیٹی ساڑی آ علاقائی پیش رفت و پاک چین تعلقداری نا چندی پلو آتیا چکار کننگک۔ دا دورہ پاکستان وچین نا نیام اٹ بڑزکو کہول انا ہن و بر و ہڑتوم آ ایلم ملک آتا نیام اٹ سدا بہار اسٹریٹجک کمکاری آ تالان شریداری نا بشخ ءِ۔ روانگی آن مست نائب وزیراعظم اسحاق ڈار میڈیا ءِ پارے کہ چین پاکستان نا بھلا واپاری شریدار ءِ و ہڑتوم آملک آتا نیام اٹ خڑکی و آہنی تعلقداری ءِ۔ اوپارے کہ تدوک آ مسہ ہفتہ غاتیٹی اونا وزیرخارجہ وانگ یی تون اِرا وار ٹیلی فون آ گپ وتران مس ہرااودے چین نا دورہ نا سلہ ءِ ہم خلکوسس۔ اوپارے کہ چینی سرکڑدہ غاتون اونا اوڑدہی تیٹی پاکستان وبھارت نا نیام اٹ ساڑی آ بے چیٹی آن بیدس سیاسی، ہندی، علاقائی و جہانی امور آ گپ وتران مریک۔ اسہ سوج اسے نا ورندی ٹی اومچ آ دنیا نا چندی اہم ڈٹ آتون تینا ٹیل فونک گپ وتران نا حوالہ ءِ ترساپارے کہ بھارتی دوبہ خلنگ نا راگ ءِ پاکستان مہالو آن بے نقاب کرینے و بھارت نا بے بنداو دوبہ خلنگ نا گوازی بھاز بے وڑ بے سہب مسنے۔
