اسلام آباد۔ 07 جولائی (اے پی پی) بنجائی وزیر حوالکاری و شینکاری سینیٹر شبلی فراز پارینے کہ کورونا دین انا برخلاف ساڑی حکومت نا حکمت عملی سرسہب مسنے، بھلا عئید انا وخت آ کورونا دین انا تالان مننگ نا گڑتی ءِ، وزیراعظم عمران خان بھلاعئید ءِ اُراٹی کننگ نا فیصلہ کرینے و الس آن ہم خواست کرینے کہ او بھلا عئید آ اُراتیٹی مریر۔ وزیراعظم خصوصی کمکار تخفیف نیزگاری و راجی رکھ ڈاکٹر ثانیہ نشتر ءِ احساس پروگرام نا ارٹ میکو مرحلہ ءِ بناکننگ نا پارت کرینے، حکومت کورونا دین و ساڑی زرگزرانی حالیت آتے ٹی متوازن بجٹ اس پیش کرینے۔ شکبر لیسن والا 28 پائلٹ آتے ملازمت آن کشانے، جعلی لیسن والا غٹ پائلٹ آتے پیپلزپارٹی و مسلم لیگ (ن) نا دور اٹ بھرتی کننگا، جعلی پائلٹ آتا معاملہ غا پی آئی اے و سول ایوی ایشن کمامدارآتا برخلاف کارروائی برجاءِ۔ داخیال آتا درشانی ءِ او سے شنبے نادے آ بنجائی کابینہ نا دیوان آن پد میڈیا ءِ حوال ترسا کرے۔ اوپارے کہ کورونا دین آن پاکستان دنیا نا ایلو ملک آتا مقابلہ ٹی کم زہمی مس، وزیراعظم عمران خان و حکومتی ٹیم انا ڈغاری راستکی تا رداٹ حکمت عملی سرسہب مسنے، گڑاس جماعت دا معاملہ غا سیاست کریر، جان جوڑی نا گچین نظام و زرگزرانی سوگوی آن پد ہم گڑاس ملک دادین انا جوان وڑاٹ مقابلہ ءِ کننگ کتوس۔ اوپارے کہ کورونا دین انابرخلاف این سی او سی نا کڑد سفت نا قابل ئس ہراٹی بنجائی وزیرآک، سیاسی و فوجی سرکڑدہ، صوبائی وزیراعلیٰ تتون اوار ایلو کمامدارآک اوار ئسر۔ داڑے سہی حساب وکتاب نا بنداو آ حکمت عملی اس ترتیب تننگاکہ ہرانا سوب لیبارٹری، ٹیسٹ نظام اٹ گچینی تون اوار ایلو گام گیج آتے کننگا۔ بناٹی اِرالیبارٹری ئسر، داسہ اوفتا کچ 129 مسنے، مہالو طبی گڑادرآمد کرینہ، داسہ برآمد کننگ اُن۔ اوپارے کہ امیریل کالج نا اسٹڈی آن ہم پک مریک کہ نن ہرا حکمت عملی ءِ اختیار کرین اوڑآن کورونا کیس آتا گراف شیف ہِننگ ءِ۔ اوپارے کہ بھلاعئید آ گڑتی ءِ کہ مخلوق زیات اسیجا مریرہ۔ ہراوڑ چنکا عئید انا وخت آ مسوسر، داڑآن کورونا نا حالیت آتا خراب مننگ نا گڑتی ءِ۔ اوپارے کہ حکومت بھلاعئید اکن سخت قاعدہ وضابطہ اس جوڑ کرینے، ضلعی انتظامیہ ءِ ایس او پی تا بابت پارت جاری کننگانے، وزیراعظم عمران خان فیصلہ کرینے کہ او بھلا عئید ءِ تینا اُراٹی کیک۔ اوالس آن ہم خواست کرینے کہ او عئید ءِ تینا اُراتیٹی گدریفر۔ اوپارے کہ ہراتم ننا حکومت بس تو غٹ زرگزرانی ٹک آک منفی ئسر۔ وزیراعظم عمران خان کفایت شعاری نا پالیسی ءِ تینا کرے، خڑچ آتے ٹی کمتی و کٹیا ٹی ودکی نا حکمت عملی سرسہب مس، کورونا نا سوب خراج کٹیا تیٹی کمتی بسنے۔ وزیر حوالکاری پارے کہ دا بجٹ اٹ ہچ ءُ خراج اس خلنگتنے و نئے الس آ بھاریم شاغنگانے۔ کابینہ سلاہکار خزانہ ڈاکٹر عبدالحفیظ شیخ نا کارکڑد اناستاءِ کرینے۔ حکومت وام تیا بھلو سود اسے نا زرتس و پی ایس ڈی پی کن فنڈ جتا کننگ آن پد ہم متوازن بجٹ اس پیش کرینے۔ کٹیا و خڑچ آتیٹی توازن ودی کرینے۔ اوپارے کہ احساس پروگرام ءِ جہانی کہول آ است بڈی ملانے، کم وخت اٹ دا پروگرام ءِ ٹہیفنگاسس، اسٹ اس ہم دا پروگرام نا شفافیت آ سوج ہرفتنے، نیزگار مخلوق ءِ 150 ارب روپئی نا مالی کمک تننگانے، وزیراعظم عمران خان سلاہکار خزانہ عبدالحفیظ شیخ و خصوصی کمکار تخفیف نیزگاری و راجی رکھ ڈاکٹر ثانیہ نشتر ءِ احساس پروگرام نا ارٹ میکو مرحلہ ءِ بناکننگ نا پارت کرینے تانکہ نیزگار مخلوق ءِ کمک فراوان کننگ مرے ۔ اوپارے کہ سول ایوی ایشن اتھارٹی کابیہ دیوان اٹ پائلٹ آتا معاملہ نا بابت رپورٹ پیش کرے۔ داوخت آ پی آئی اے کمامدارآک ہم ساڑی ئسر۔ وزیراعظم عمران خان نا پارت آ کراچی شکست آن پد انکوائری نا بناءِ کننگا، نن سفر ءِ رکھ کننگ خوانہ، نن پائلٹ آتا کوالیفیکیشن اٹ شفافیت خوانہ، ہراپائلٹ آتا لیسن تیا شک مسوسس اوفتے گراؤنڈ کننگا، دا بابت غٹ شریدار آتے معلومدار کننگانے، 28 پائلٹ آتا برخلاف انکوائری پورو مننگ آن پد اوفتے ملازمت آن کشنگانے، پی آئی اے و سول ایوی ایشن کمامدارآتا برخلاف کارروائی برجاءِ، 2010ء آن 2018ء ٹی جعلی و شکبر لیسن جاری کننگا، پائلٹ آتے مسلم لیگ (ن) و پیپلزپارٹی نا دور حکومت آتے ٹی جعلی لیسن جاری کننگا، داوڑنا مافیا نا برخلاف بے خوف و خلیس کارروائی برجاسلک، پی آئی اے و سول ایوی ایشن اتھارٹی ٹی اصلاحات ناعمل برجاسلک۔ اوپارے کہ کابینہ دیوان اٹی شوگر انکوائری کمیٹی نا سلاہ و سوج آتیا عملدرآمد آ پیش رفت نا سرجم جاچ ءِ ہلنگا۔ وزیر صنعت وپیداوار حماد اظہر پارے کہ شوگر ریفارمز کمیٹی اس ٹہیفنگانے، بورہ نا سپلائی چین اٹی گچینی اتنگ انگ ءِ تانکہ الس ءِ اڑزآن بورہ نا فراوانی نا وارخواہی ودی مرے۔ بنجائی کابینہ منی لانڈرنگ نا کانود ءِ پین گچین کننگ نا منظوری ءِ تس۔
