اسلام آباد۔ 19مئی (اے پی پی) بنجائی وزیر واپار جام کمال خان پارینے کہ ملکی زرگزران گچینی نا کنڈآ ہِننگ ءِ، واپار نا مون آ دننگ کن پوسکن آ منڈی تے پٹنگ اُن، ٹریڈ پالیسی فریم ورک آ کاریم برجاءِ ہراڑآن غٹ اسٹیک ہولڈر آتے فائدہ مریک۔ داخیال آتا درشانی ءِ او دوشنبے نادے آ داڑے ہندی ہوٹل اٹی فوڈ اینڈ ایگریکلچر آرگنائزیشن و وزارت واپار نا کمک اٹ اڈ ہلوک جغرافیائی مصنوعات آتا درستی راستی نا بابت قومی کانفرنس آن تران اٹی کرے۔ دود آن تران اٹی بنجائی وزیر واپار پارے کہ جیو گرافیکل انڈیکشن سسٹم کانفرنس آزموندہ غاتا ہل و تس انا موقع فراوان کیک و وزارت واپار دا سسٹم آ عملدرآمد کن سنبرینگوک ءِ۔ اوپارے کہ الس ءِ جیو گرافیکل انڈیکشن سسٹم نا بابت معلومداری فراوان کننگ نا گرج ءِ۔ بنجائی وزیرپارے کہ جیو گرافیکل انڈیکیشن سسٹم آن ہندی دودوربیدہ، کسب و انسانی خواری ءِ رکھ ملک، جغرافیائی درستی راستی ہندی مصنوعات آتے جہانی کہول آ یکتا پہچان ایتک۔ جام کمال پارے کہ پاکستان اٹی 200آن زیات مصنوعات گمانی جی آئی نا وڑاٹ شناخت مسنے، داتم اسکان 20 مصنوعات جی آئی نا رداٹ رجسٹرکننگانے ہرافتے ٹی باسپتی برنج، چلغوزہ، سندھڑی امب، پشاوری چپل، چونسا امب، سرگودھانا کنو و ملتان نا نیلی مٹی اوار ءِ۔ اوپارے کہ جہانی کہول آ پاکستانی مصنوعات نا حق انا رکھ انا گام گیج کننگانے، جی آئی سسٹم آن برآمد آتیٹی ودکی وجہانی مارکیٹ اٹی گچین ہند اس دوئی مریک۔ بنجائی وزیرپارے کہ ڈومیسٹک کامرس پالیسی نا رداٹ وسیلہ غاتے کاریم اٹ اتنگ کن صوبہ غاتون اواری اٹ کاریم کینہ، ساڑی آ دور اٹی ای کامرس و ڈیجیٹل کنیکٹویٹی نا اہمیت ودانے ہراڑآن فائدہ ہرفنگک۔ جام کمال پارے کہ جی آئی سسٹم بیرہ واپار اف دا چاگڑد و کمیونٹی نا پائیداری نا ذریعہ ہم ارے ۔ اوپارے کہ حکومت جتا جی آئی رجسٹری نا جوڑ کننگ کن کاریم کننگ ءِ۔ جی آئی نظام نا گچینی کن قومی حکمت عملی اس تیار کننگ انگ ءِ۔ دا سسٹم نا سوگوی آن پاکستان نا دودوربیدہ ئی و کشاری میرات رکھ سلک۔ اوپارے کہ کچ اٹ آگاہی و ادارہ جاتی رابطہ غاتا کمتی جی آئی نظام اٹی بھلو اڑاند اسے۔ جام کمال پارے کہ جی آئی سسٹم پاکستان نا زرگزران اٹی پوسکن ءُ ساہ اس شاغنگ کیک و دا سسٹم آن چنکا بزغر، کاریگر و سپلائی چین اٹی اوار ایلو بندغ آتے فائدہ رسینگک۔
