اسلام آباد۔ 17 دسمبر (اے پی پی) پاکستان و سری لنکا نا کرکٹ ٹیم تا نیام اٹ اِرا ٹیسٹ میچ آتیا تالان سیریز نا ارٹ میکو و آخیریکو ٹیسٹ میچ (پگہ) پنچ شنبے نادے آن نیشنل کرکٹ اسٹیڈیم، کراچی ٹی بناکیک، میچ اکن ہڑتوم آ ٹیمک کراچی ٹی ساڑی ءُ، ارٹ می و آخیریکو ٹیسٹ میچ آن مست (اینو) چارشنبے نادے آ ہم ہڑتوم آ ٹیمک سٹیڈیم اٹی پریکٹس کیرہ، ہڑتوم آ ٹیم تا نیام اٹ داکان مست فروری 2009ء ٹی کراچی نا ہند آ میچ اس گوازی کننگاسس ہرا کٹنگ و باتننگ نا فیصلہ غان بیدس چٹاسس۔ پاکستان نا ٹیم کراچی ٹی 41 ٹیسٹ میچ گوازی کرینے ہرافتیان اودے 21 اٹی فتح دوئی مس۔ سری لنکن ٹیم دیمتھ کرونارتنے نا کماشی ٹی کراچی ٹی ساڑی ءُ، سری لنکن گوازی گر آک پاکستان آ بننگ آ بھاز خوش ءُ و داڑے سیکورٹی نا بست و بند آتیان است جم ءُ۔ داکان مست ہڑتوم آ ٹیم تا نیام اٹ اِرا ٹیسٹ میچ آتا سیریز اس راولپنڈی ٹی مس اولیکو میچ پِر و خراب روشنائی نا گواچی مسوسس و بیدس نتیجہ غان چٹاسس۔ پاکستان و سری لنکا نا نیام اٹ سیریز ورلڈ ٹیسٹ چیمپین شپ انا بشخ ءِ، ہڑتوم آ ٹیم تا نیام اٹ سیریز اٹی سیکورٹی نا گچین بست و بند کننگانے۔ نیشنل کرکٹ اسٹیڈیم کراچی نا چارمہ کنڈ سیکورٹی نا فول پروف بست و بند کننگانے۔ سری لنکن ٹیم دیمتھ کرونارتنے نا کماشی ٹی میدان اٹ دڑنگک وخت اس کہ پاکستانی ٹیم انا کماشی ءِ اظہر علی کیک۔ 19 آن 23 دسمبر اسکان نیشنل کرکٹ اسٹیڈیم کراچی ٹی گوازی مروک آ ارٹ میکو ٹیسٹ میچ اٹی مہمان ٹیم انا کیپٹن دیمتھ کرونارتنے ءِ وخت اس کہ ایلو گوازی گر تیٹی انجیلو میتھیوز، چندیمل، کوسال پریرا، نیروزن ڈکویلا، سنداکان، کاسون راجتھا، وشوافرنینڈو، لاہیروکمارا، لاستھ ایمبولدینیا، دلروان پریرا، دھنجایا ڈی سلوا، لاہیرو تھریمانے و اوشاندہ فرنیڈو اوار ءُ۔ ہڑتوم آ ٹیم تا نیام اٹ ارٹ میکو ٹیسٹ اکن ٹکٹ آتا بہاکننگ نا چرجوئی برجاءِ، ٹیسٹ کرکٹ نا تاریخ اٹی پاکستان و سری لنکا نا نیام اٹ اولیکو میچ مارچ 1982ء ٹی نیشنل کرکٹ اسٹیڈیم کراچی ٹی مسوسس، میچ اٹی پاکستان کرکٹ ٹیم نا کماشی ءِ جاوید میاں داد و سری لنکن کرکٹ ٹیم نا کماشی ءِ بنداولاورناپورو کریسس، میچ اٹی پاکستان 204 رنز اٹ سرسہبی دوئی کریسس۔
