اسلام آباد ۔ 12ستمبر (اے پی پی) صدر مملکت ڈاکٹر عارف علوی جہانی برادری ءِ خبڑدار کرینے کہ بھارت نا انتہاپسند سرکڑدہ غاتا کنڈآن مقبوضہ کشمیر اٹی ممکنہ نسل کشی آن چشم پوشی جہانی امن و سوگوی کن خطرہ نا سوب مریک ، پاکستان بھارت آ پیدوار کننگ خواہک کہ مظلوم کشمیری تا نسل کشی ءِ اسل سگنگ پننگک ۔ مچ آ پاکستانی قوم تینا کشمیری ایڑھ ایلم تتون سلوک ءِ، نن اسہ جاگہ اس ہم اوفتے تنیا الیپنہ، نن اوفتے تون سلوک ئسن ، ارین و مدام سلنہ، بھارتی حکمران تے پانہ کہ او ہوش کیر و حالیت ءِ ہموتسکان دپس کہ ہراکان پدی بننگ ممکن مف، ننا امن نا است خواہی ءِ نزور تکنگپ ۔ اوداخیال آتا درشانی ءِ پنچ شنبے نادے آ پارلیمان نا اسیجا دیوان آن تران کرسا کرے ۔ ہرانا کماشی ءِ چیئرمین سینیٹ صادق سنجرانی و اسپیکر قومی اسمبلی اسد قیصر اواری وڑاٹ کریر ۔ وزیراعظم عمران خان ہم دیوان اٹی ساڑی ئسک ۔ صدر مملکت تینا تران اٹی مقبوضہ کشمیر نا ساڑی حالیت آتا ذکر ءِ کرسا پارے کہ تدوک آ دے تیٹی بھارت نا کنڈآن مقبوضہ جموں و کشمیر نا بابت کروک آ گام گیج آتیا حکومت پاکستان و الس تینا شدید ردعمل نا درشانی ءِ کرینو ۔ بھارت تینا غیر کانودی و اسہ کنڈی گام گیج آتیان نئے بیرہ اقوام متحدہ نا قرارداد و جہانی کانود نا خلاف ورزی ءِ کرینے بلکن شملہ معاہدہ نا روحءِ ہم ٹھیس تسنے ۔ اوپارے کہ دا چرجوئی ٹی پارلیمان 7 اگست 2019 ء ناتینا اسیجا دیوان اٹی مقبوضہ جموں و کشمیر اٹی بھارتی حکومت نا کنڈآن ہرفوک آ غیر کانودی و اسہ کنڈی گام گیج آتا امنائی وڑاٹ ترندی اٹ مذمت ءِ کریر ۔ صدر مملکت پارے کہ حکومت بھارت تون سفارتی تعلقداری تیٹی کمتی ، واپار ءِ بند کننگ، ہڑتوم آ کنڈآتا تعلقداری تا اول سرآن جاچ ءِ ہلنگ و کشمیر نا ویل ءِ اقوام متحدہ نا سلامتی کونسل و ایلو جہانی ادارہ غاتے ٹی پبی وڑاٹ ہرفینے ۔ اوپارے کہ داپاکستان نا بھاز بھلو سفارتی سرسہبی اسے کہ 50 سال پد کشمیر نا ویل ءِ اقوام متحدہ نا سلامتی کونسل اٹ شرہ ٹی اتنگا خاص کر ہراتم بھارت خصوصی دیوان اٹی اودے زیر بحث اتنگ آن توننگ کن تینا زور ءِ خلککہ ۔ کشمیر نا ویل آ دہائی آن پد سلامتی کونسل نا دیوان اٹی گپ و تران داہیت انا عکاسی ءِ کہ کشمیر بھارت نا تہہ نا معاملہ اف بلکن اسہ جہانی ءُ ایسر نا چاری ویل اسے ہرانا اقوام متحدہ نا سلامتی ایسری کن جہانی برادری خاص کر کونسل ءِ تینا پبی کڑدادا کروئی مریک ۔ ورنہ دا ویل علاقائی و جہانی امن کن بھلو خطرہ سے نا سوب مننگ کیک ۔ اوپارے کہ داڑتون اوار اوار اسلامی کمکارتنظیم (او آئی سی ) کشمیر اٹی بھارت نا کنڈآن کروک آ غیر کانودی و جارحانہ گام گیج آتا ترندی اٹ مذمت ءِ کرینے و خواست کرینے کہ مقبوضہ جموں و کشمیر اٹی ہروڑنا پابندی تے زوت آن زوت چٹفنگے و دا دیرینہ تنازعہ نا ایسری اقوام متحدہ نا قراردادآتا رداٹ ایسر کننگے ۔ داکان بیدس اقوام متحدہ نا انسانی حق انا کونسل ہم دا معاملہ غا 58 ملک آتا مخ تفی آن مشترکہ بیان اس جاری کرینے ہراٹی بھارت آن داخواست کننگانے کہ او مقبوضہ جموں و کشمیر اٹی غٹ پابندی تے دمدستی وڑاٹ چٹفے ۔ صدر مملکت دا غٹ سنگت ملک آتا ہم منت واری ءِ ہرفے ہرافک کشمیر نا ویل انا سنگینی ءِ پہہ مرسا سلامتی کونسل نا دیوان نا سرسہب اڈتننگ اٹ تیناکڑد ءِ ادا کریر ۔ اوپارے کہ دارداٹ نن چین نا کوشست آتا است انا حب اٹ منت واری ءِ ہرفینہ ۔ صدر وزیراعظم نا سرسہب امریکی دورہ ٹی صدر ٹرمپ انا چکار ءِ مقبوضہ کشمیر نا کنڈا کرفنگ نا ستاءِ کرساپارے کہ پاکستان امریکہ نا مقبوضہ کشمیر نا منصفانہ و دیر پا ایسری کن ثالثی نا ہر کوشست نا خیرمقدم ءِ کیک ۔ اوپارے کہ 9لکھ بھارتی فوجی تا ساڑی گری نا سوب آن مقبوضہ جموں و کشمیر داوخت دنیا نا غٹ آن زیات کچ انا تخوک فوجی علاقہ ءِ ۔ اوپارے کہ بھارت جابرانہ چم آتے کاریم اٹ اتسا کشمیری تا توار ءِ توننگ کپک ۔
