ریاست درملکی سرمایہ کار ءُ پاکستانی کاروباری مردمانی جان، مال ءُ کاروبار ءِ رکھینگ ءِ ھاترا انت، طلال چوہدری

فیصل آباد۔ 19 اپریل (اے پی پی):پاکستان مسلم لیگ نواز ءِ مزنیں سروک تہی کارانی وزیر ءِ مملکت طلال چوہدری ءَ گشتگ کہ درملکی سرمایہ کار ءُ پاکستانی کاروباری مردمانی جان، مال ءُ کاروبار ءِ رکھینگ ریاست ءِ مستریں ذمہ واری انت۔  کاروباری ادارہانی سرا اُرش غیر اسلامی ءُ غیر آئینی انت ءُ ریاست وتی فرض ءَ چہ ہچ وڑ ءَ بے پرواہ نہ انت۔ اے ھیالانی درشانی آئی ءَ شمبے ءِ روچ ءَ فیصل آباد ءَ وتی گس ءَ ھاسیں پریس کانفرنس ءَ گوں تران کنان ءَ کت۔ آئی ءَ گوشت کہ سرجمیں ملک ءَ فاسٹ فوڈ چین آنی سر ءَ اُرش ایوک ءَ ملکی معیشت ءِ سر ءَ لگت نہ انت بلکینگ ءَ ھزاراں پاکستانی ھاندان آنی رومانٹی ءِ سر ءَ ھم لگت انت۔ ایوک ءَ پنجاب ءَ 12 کیس نبشتہ کنگ بوتگ ءُ زوراکی ءِ وئیلاں 142 مردم دزگیر کنگ بوتگ ۔ اسلام آباد ءِ دو واقعہ ءَ 15 مردم ھم دزگیر کنگ بوتگ اَنت۔ آئی ءَ گوشت کہ دزگیریں مردم نوں وتی کار آنی سر ءَ پشومان ءُ شرمندگ اَنت ءُ معاف لوٹگ ءَ اَنت۔ آئی ءَ گیش کرتگ کہ پاکستان یک اسلامی جمہوری ملکے ءُ آئین ءِ تہ ءَ اے گپ پدر کنگ بوتگ کہ درملکی مردمانی رکھینگ ریاست ءِ ذمہ واری اِنت۔ کے ایف سی ءَ ھوار گلوبل فوڈ چین ءِ سر ءَ 20 جاھاں اُرش کنگ بوتگ کہ ایشی ءِ تہ ءَ یک شہری یے بیران بوتگ۔ طلال چوہدری ءَ گشتگ کہ اے وڑیں اُرش تھنا یک ہفتگے پیسر بوتگ انت بلے مزن وزیر ءُ داخلہ ءِ وزارت ءِ نیمگ ءَ چہ ھاسیں ہدایت ءِ پد ءَ جاور ھال کنٹرول ءَ انت۔ آئی ءَ گوشت کہ 25 ھزار پاکستانی ھاندان آنی زندمان ھمے گلوبل فوڈ چین آنی گوما بندوک انت۔ اے کمپنی سد درسد ٹیکس دینت ءُ وتی دراہیں ساماناں چہ پاکستان ءَ زور اَنت کہ چہ ایشی ءَ دمگی معیشت ءَ نپ رسیت۔ ایشانی نپ ہم پاکستان ءَ مانیت۔ اے برانڈز ءَ را تاوان دیگ اصل ءَ پاکستان ءَ را تاوان دیگ ءِ برابر اِنت۔ آئی ءَ گوشت کہ پاکستان ءِ چاریں صوبہ آنی تہ ءَ اے اُرش آنی ھلاپ ءَ سکیں گامگیج زورگ بوھگ ءَ انت۔ بلوچستان ءِ تہا ریکو دیک پروجیکٹ بہ بیت یا سی پیک، ہر سرمایہ کاری ءِ رکھینگ ءِ ذمہ واری ریاست پاکستان ءِ سرا انت۔ دراھیں مذھبی ءُ سیاسی گلاں چہ اے اُرشاں وتی کشگ ءِ جار جتگ ءُ زانتکاراں ھم فتویٰ داتگ کہ آیاں درملکی کاروبار جائز لیک اِتگ۔ طلال چوہدری ءَ گشتگ کہ سوشل میڈیا ءَ اشتعال انگیزی شنگ کنوکیں مردمانی حلاف ءَ ہم کارروائی کنگ بوہگ ءَ انت دیمترا اے وڑیں ہچ وڑیں وئیل ءِ موہ دیگ نہ بیت۔ آئی ءَ گوشت کہ فلسطین ءِ ھوالگ ءَ مزن وزیر ءِ موقف جہانی پڑ ءَ درستاں چہ گیش دیم ءَ انت ءُ ما درست فلسطین ءِ الس ءِ گوما اوشتاتگ آں، بلے زھرشانی کانود ءِ رد ءَ کنگ بہ بنت۔ پریس کانفرنس ءِ گڈ ءَ طلال چوہدری ءَ سرجمیں صوبائی حکومت، سیکورٹی ادارگ ءُ الس ءِ منت گپت کہ آہاں ملک ءِ امن ءُ ایمنی ءُ اقتصادی ایمنی ءِ برجائی ءِ واستہ وفاقی حکومت ءِ سرجمیں کمک کتگ۔