اسلام آباد۔ 13ستمبر (اے پی پی) بنجائی وزیر عمر ایوب خان پارینے کہ کراچی ٹی پِرآن مروک آ مرک آتا پورو جاست وپاست نا عمل برجاءِ، 8810فیڈر آتیان 80 درسد فیڈر آتے کلیئر کننگانے۔ گڑاس فیڈر آ لوڈمینجمنٹ المی ءِ، اگہ دُن کپن تو گردشی کڑز آک ودنگرہ۔ جمعہ نادے آ قومی اسمبلی ٹی وقفہ سوج آتے ٹی عبدالقادر پٹیل نا سوج انا ورندی ٹی بنجائی وزیر عمر ایوب خان پارے کہ لاڑکانہ تون اوار سندھ انا ہمو علاقہ غاتے ٹی ہم بجلی فراوان کننگ انگ ءِ ہراڑے مہالو بجلی ءِ دُزی کننگ نا سوب آن ہژدہ ہژدہ گھنٹہ بجلی الوکہ۔ اوپارے کہ حکومت بجلی نا مد اٹ 192ارب روپئی ودکی ریونیو دوئی کرینے۔ دا پیسہ غاک سبسڈی آن بیدس ءُ۔ اوپارے کہ صوبائی حکومت ننے پائے کہ کراچی ٹی دیر انت اکن جمع مریک۔ پیپلزپارٹی نا کرپشن و نابودی نا سوب آن کراچی ٹی ویل آک ءُ۔ کے الیکٹرک نا بابت نیپرا جاست وپاست کرینے۔ 16آن 17 مرک مس۔نیپرا کے الیکٹرک ءِ زموار کرینے۔ حکومت دا بابت کارروائی کیک۔ شاہدہ اختر علی نا ضمنی سوج آ بنجائی وزیر پارے کہ 8810 فیڈر آتیان 80 درسد ءِ کلیئر کننگانے۔ 1300 فیڈرآتیا لوڈمینجمنٹ مننگ ءِ انتئے کہ اگہ دُن کپن تو سرکلر کڑزآک ودنگ کیرہ۔ مختار احمد ملک نا سوج آ پارلیمانی سیکرٹری خیال زمان پارے کہ بھلوال اٹی اسکیم جون 2020ء اسکان پورو مریک۔
