بلوچستان اٹی چنکا 100 ڈیم تا جوڑ جاڑ کن جتا و کاریم اٹ اتوک آ فنڈ ، کچھی کنال ڈٹ و وادی یاسین گلگت اٹی دیر انا سپلائی اسکیم نا معاملہ غاتا جاچ ئِ ہلنگا
اسلام آباد۔ 25جنوری (اے پی پی) سینیٹ نا قائمہ کمیٹی ڈٹ بندی و شونداری و اصلاحات نا دیوان چیئرمین کمیٹی سینیٹر کرنل (ر) سید طاہر حسین مشہدی نا کماشی ٹی پارلیمنٹ لاجز اٹی اڈ ہلک۔ دیوان اٹی بلوچستان اٹی چنکا 100 ڈیم تا جوڑجاڑ کن جتا و کاریم اٹ اتوک فنڈ و ڈیم تا داوخت اسکان نا پوروی نا مرحلہ، کچھی کنال ڈٹ انا معاملہ غاتیان بیدس وادی یاسین گلگت اٹی دیر انا سپلائی نا اسکیم نا معاملہ غاتا سرجم اٹ جاچ ئِ ہلنگا۔ محکمہ آبپاشی صوبائی حکومت بلوچستان نا کمامدار آک پاریر کہ صوبہ بلوچستان رقبہ نا لحاظ اٹ غٹ آن بھلا و آبادی نا لحاظ اٹ غٹ آن چنکا صوبہ ئِ ہراڑے سالانہ دہ ملین ایکڑفٹ پِرمریک ولے کچ اٹنگا وسیلہ غاتا سوب صوبائی حکومت بیرہ 2.5ملین ایکڑ فٹ دیر کوڑی کننگ کیک، ایلو 7.5ملین ایکڑ فٹ دیر سمندراٹی زیان مریک۔ صوبائی حکومت تینا کچ اٹنگا وسیلہ غاتیان 7.5ارب روپئی آن 444چنکو ڈیم جوڑ جاڑ کرینے۔ صوبہ بلوچستان اٹی ہچ ئُ صنعتی یونٹ اس اف۔ خلقت نا ذریعہ معاش بیرہ آبپاشی ئِ۔ ڈغار نا تہٹی دیر سد آ فٹ شیف ئِ۔ آبادی ئِ کنوئی آ صاف دیر انا ویل آک مون تروک ئُ۔ 18دریاتیا20ڈیم جوڑ کننگ نا فزیبلٹی سٹڈی 18تو اٹی پورو مریک و دریاژوب آ فزیبلٹی سٹڈی کرفنگ کن ایشین ڈویلپمنٹ بینک کمک کیک۔ بنجائی حکومت نا مدد آن 27ڈیم جوڑ جاڑ کننگ انگ ئِ ہرافتے ٹی ہشت مست آن برجاہ ئُ۔ چنکا 100 ڈیم تیان 60جوڑ مسنو۔ اوپارے کہ دیر انا وسیلہ غاتا مون ئِ توننگ کن بنجائی حکومت 100 ارب روپئی نا پیکج اٹی کمک کے۔ ہراڑآ چیف پلاننگ کمشنر پارے کہ صوبہ ماسٹر پلان اس جوڑ کرسا تروئی ئس ولے داسکان جوڑ متنے بنجاہ کمک کن تیار ئِ۔ یکونیم ارب نا فنڈ دیر انا ڈٹ جاٹ کن تموک ئِ۔ پی سی ون جوڑ مننگ کتو۔ صوبائی حکومت پی سی ون ئِ ایتے تو سی ڈی ڈبلیو ڈی پی آن زوت منظور کرفنگک۔ جوائنٹ سیکرٹری واپڈا پارے کہ بلوچستان کن دوسد ارب نا ڈٹ جاٹ ئُ ہرافتیان ویل آک ایسر مننگ کیرہ۔ سینیٹر عثمان کاکڑ پارے کہ صوبائی حکومت ہفت ئُ نیم ارب آن 44چنکو ڈیم تیار کرینے و بنجائی حکومت 2008 آن 100 ڈیم جوڑ جاڑ کروئی ئس ولے داسکان بیرہ 60جوڑ مننگ کرینو۔ بنجائی حکومت صوبہ بلوچستان اٹی دیر انا کمتی ئِ پورو کننگ و صوبہ و الس نا شونداری کن دوسد ارب روپئی فراوان کے۔ ہراڑآن مسہ ہزار چنکو ڈیم آسانی اٹ جوڑ مننگ کیرہ۔ کمیٹی نا باسک آک صوبائی حکومت نا ادارہ غاتے کاریم زوت پورو کننگ نا پارت کرسا بنجائی حکومت آن فنڈ انا فراوانی نا سفارش کریر۔ چیف پلاننگ پارے کہ پی ایس ڈی پی نا 18ڈٹ آتیان 16نا پی سی ون جوڑ مننگ کتنے۔ ہراڑآ چیئرمین کمیٹی پارے کہ صوبائی محکمہ غاک کارکڑ دئِ گچین جوڑ کیر۔ صوبہ بلوچستان اٹی دیر انا حالیت خراب ئِ ہرا ساہدار تے کن مشکل آتا سوب جوڑ مننگ کیک۔ سینیٹر سعید الحسن پارے کہ خندق آتے ختسا ڈغار نا تہٹی دیر انا کہول ئِ گچین جوڑ کننگ مریک۔ ہرا پِرتا دیک زیان مریرہ او زیان مننگ آن بچرہ۔ قائمہ کمیٹی نا دیوان اٹی کچھی کینال ڈٹ انا جاچ ہلنگا۔ قائمہ کمیٹی فیصلہ کرے کہ بروک آ دیوان اٹی سیکرٹری دیر و بجلی و چیئرمین واپڈا ئِ بٹنگسا سرجم اٹ جاچ ئِ ہلنگک۔ کمیٹی ئِ پاننگاکہ کچھی کینال 300 کلو میٹر پنجاب و 200 کلومیٹر بلوچستان آن گدرینگک۔ داڈٹ بلوچستان نا ڈغار تے زرخیز جوڑ کننگ کن ئِ۔ اگہ دہ ارب روپئی سپلمنٹری فراوان کننگے تو جون اسکان 97کلو میٹر آ کاریم مریک۔ دیوان اٹی سینیٹر محمد عثمان خان کاکڑ، سعید الحسن مندوخیل، کریم احمد خواجہ غان بیدس ایڈیشنل سیکرٹری واپڈا، چیف پلاننگ کمیشن، جنرل منیجر واپڈا ، ڈپٹی سیکرٹری محکمہ آبپاشی صوبہ بلوچستان و ایلو بڑزکو کمامدارآک ساڑی ئسر۔
