کوئٹہ۔ 25جنوری (اے پی پی) وزیراعلیٰ بلوچستان نا کوآرڈینیٹر مرزاشمشاد مغل پارینے کہ 5فروری آ کوئٹہ تون اوار مچ آ بلوچستان اٹی یوم یکجہتی کشمیر نا وخت آ بھارتی بیدادی آن جہانی برادری ئِ معلومدار کننگ کن ریلی ، کانفرنس و سیمینار اڈتننگک۔ کشمیر و پاکستان لازم و ملزوم ئُ۔ کشمیری ورناک مقبوضہ کشمیر اٹی کوزہ گر بھارت فوج انا بیدادی تا باوجود جہد آجوئی کن قربانی تننگ ئُ ، ہرافتا لازوال قربانی تا سوب کشمیر زوت آجومریک۔ داہیت ئِ او چارشنبے آ ”اے پی پی“ تون ہیت وگپ کرسا پارے۔ مرزا شمشاد مغل پارے کہ بھارتی کوزہ گر فوج انا کنڈآن لکھ آ کشمیری تا شہیدی ، نیاڑی تا بے حرمتی و ہزار آ گمنام قبرآتا دریافت نا باوجود مقبوضہ کشمیر نا الس نا جوزہ حریت برقرار ئِ و او کشمیر نا آجوئی آن بیدس بھارت نا ہچ ئُ ہیت اسے مننگ کن تیار افس۔ اوپارے کہ مظفر وانی نا شہیدی آن پد مقبوضہ کشمیر اٹی ہندوستان آن خار و بیزاری ٹی ودکی مسنے وخت اس کہ مظفر وانی نا نمازجنازہ ٹی لکھ آ تا کچ اٹی طالب علم ، ورناو بزرگ آک پاکستان نا بیرک اتون ساڑی مرسا داثابت کریر کہ کشمیر پاکستان نا شہ رگ ئِ۔
