اسلام آباد۔22جون (اے پی پی):نائب مزن وزیر ءُ درئی کارانی وزیر سینیٹر محمد اسحاق ڈار ءَ ایران ءِ حاکمیت ءِ ھلاپ ءَ برجاھیں اسرائیل ءِ زوراکی ءِ پاکستان ءِ سکیں مذمت ءِ یک رندے پدر کتگ ءُ اسرائیل ءِ ناجائزیں کارانی احتساب ءِ لوٹ کتگ۔ یک شمبے ءِ روچ ءَ استنبول ءَ او آئی سی ءِ دری کارانی کونسل ءِ 51می دیوان ءِ ساھت ءَ جاڑی بوتگیں بیان ءِ تہ ءَ آئی ءَ گوشت کہ پاکستان ایران ءِ سر ءَ اسرائیل ءِ بے جاہ ءُ ناجائزیں زوراکی ءَ را سک باز مذمت کنت۔ آئی ءَ گیش کرتگ کہ ما ایران ءَ وتی برات ءُ گہاراں گوں یکوئی ءِ درشان کن ایں ءُ اسرائیل ءِ نیمگ ءَ چہ شہری دمگاں نشانگ جوڑ کنگ ءِ آسر ءَ بازیں مردمانی بیرانی ءِ سر ءَ دلپدردی درشان کن ایں ۔ آئی ءَ گوشت کہ اسرائیل ءِ زوراکی ھما وھد ءَ بوتگ کہ میاں اوستمانی ایٹم توانائی ایجنسی وتی تصدیق ءِ عمل ءَ را برجاہ دارگ ءَ انت۔ اسرائیل ءَ آئی اے ای اے ءِ ایمنیں آسراتی آنی سر ءَ اُرش کنان ءَ میان اُستمانی کانود ءُ آئی اے ای اے ءِ بازیں کانود ءُ قرارداد آنی ھم ھلاپ ورزی کتگ۔ آئی ءَ گوشت کہ اے اُرش آناں یک خطرناکیں پیشگال ءِ جوڑ کتگ ءُ دمگ ءُ سرجمیں دگنیا ءَ شہری آبادی ءِ جان سلامتی ءَ را سک باز ھترہ ءِ آماچ کتگ۔ آئی ءَ گیش کرتگ کہ پاکستان اسرائیل ءِ بے دروریں ءُ بے سوبیں زوراکی ءِ پسو ءَ اقوام متحدہ ءِ منشور ءِ آرٹیکل 51 ءِ رد ءَ ایران ءِ وت دفاع ءِ ذاتی حق ءِ سرجمیں حمایت ءَ کنت۔ نائب مزن وزیر ءُ دری کارانی وزیر ءَ گیش کت کہ اسرائیل ءِ دوئیں رہبند بے درور انت۔ اسرائیل ءِ بابت ءَ قانون ءِ حاکمیت، رھبندانی سرا مبنی میان استمانی پرمان یا ناجائزیں کارانی آسر ءِ گپ ھچبر نہ بوتگ، اے رعایت ءِ ھلاس کنگ المی اِنت۔ آئی ءَ اے گپ ءِ سر ءَ زور پر دات کہ اے نوں ھلاس کنگ بہ بیت۔ آئی ءَ گوشت کہ ایران ءِ سر ءَ اسرائیل ءِ زوراکی یک ایوکیں وئیل ءِ نہ اِنت۔ اے جنگولی ءِ یک خطرناکیں ءُ برجاہیں دروشمے ءِ بہر اِنت کہ اسرائیل ءَ سرجمیں میان اُستمانی تک ءَ پیش داشتگ۔ آئی ءَ گیش کرتگ کہ اسرائیل ءِ زوراکی نہ ایوک ءَ دمگ ءِ بلکیں سرجمیں دگنیا ءِ امن ءُ ایمنی ءِ ھاترا مزنیں ھترہ یے جوڑ کنت۔ نائب مزن وزیر/دری کارانی وزیر ءَ گوشت کہ اقوام متحدہ ءِ سلامتی کونسل ءِ غیر دائمی باسک ءِ بستار ءَ پاکستان ءَ گوستگیں ھپتگ ءَ اقوام متحدہ ءِ سلامتی کونسل ءِ ایمرجنسی دیوان ءِ دعوت دیگ ءِ سرجمی ءَ حمایت کتگ کہ ایران ءِ سر ءَ اسرائیل ءِ زوراکی ءِ سر ءَ گپ ءُ تران کنگ بہ بیت ءُ کونسل ءَ را لوٹ کتگ کہ آ اسرائیل ءِ زوراکی ءِ ھلاسی ءِ واستہ ترندیں گامگیج بہ زوریت۔ متاسفانه کونسل فالج ءِ آماچ انت کہ آئی ءَ اے گپ ءِ سرا پشومان بوتگ۔ آئی ءَ گیش کرتگ کہ پاکستان ءَ ایران ءِ ھوالگ ءَ دگہ بازیں گامگیج آنی ھم کمک کتگ ایشانی تہ ءَ بازیں اسلامی ملک آنی دری کارانی وزیر آنی کمک ھوار اِنت ءُ ھمے رنگ ءَ ایس سی او ءُ آئی اے ای اے ءِ تہ ءَ ھم کمک کتگ۔ آئی ءَ گیش کرتگ کہ ما ایران ءِ جوہری جیڈھ ءِ گیش ءُ گیوار ءِ ھاترا امن ءُ ایمنی ءِ وسیلگ، سفارتی رابطہ ءُ برجمیں گپ ءُ تران ءِ حمایت ءَ کن ایں ۔ آئی ءَ دل یکیمی درشان کت کہ اے گند ءُ نند ءَ چہ نہ ایوک ءَ ایران ءِ براتیں ملک ءِ واستہ مئے بے مٹیں کمک ءِ پدر کنگ بیت بلکیں اے گپ ءِ پدریں پیغام ھم دیم ءَ کیت کہ اسرائیل ءَ را احتساب کنگ بہ بیت ءُ بے پرواہی ءُ زوراکی ءِ وسیلگ ءَ دمگی امن ءَ را ھترناک کنگ ءِ اجازت دیگ نہ بیت۔
