اسلام آباد۔ 06دسمبر (اے پی پی) امریکہ پارینے کہ اوغان حکومت و طالبان تا نیام اٹ سیاسی تصفیہ خواہک و داہیت ءِ ہم المی جوڑ کننگک کہ اوغانستان نا ڈغار ءِ وخت اس ہم جہانی دہشت گردی کن کاریم اٹ بفک۔ پنچ شنبے نادے اسلام آباد اٹی امریکی سفارت خانہ نارداٹ امریکی نمائندہ خصوصی اوغان مفاہمتی عمل سفیرزلمے خلیل زاد دسمبر 4 آن 6 اسکان اسلام آباد نا دورہ ءِ کرے۔ اونا دورہ نا مسخت اکتوبر اٹی مروک آ تین پہ تینی مذاکرات آن پد مروک آ پیش رفت نا جاچ ءِ ہلوئی ئسک۔ امریکی نمائندہ خصوصی وزیراعظم پاکستان عمران خان ، وزیر خارجہ شاہ محمود قریشی ، سیکرٹری خارجہ تہمینہ جنجوعہ ، چیف آف آرمی اسٹاف جنرل قمر جاوید باجوہ و اسلام آباد اٹی ایلو سفارت کار آتون اوڑدہی کرے۔ تینا اوڑدہی تے ٹی سفیر خلیل زاد دا عزم انا اعادہ ءِ کرے کہ امریکہ ، اوغان حکومت و طالبان نا نیام اٹ سیاسی تصفیہ ناایسر نا خواہندار ءِ ہراڑان داہیت ءِ المی جوڑ کننگ مریک کہ اوغانستان نا ڈغار ءِ وخت اس ہم جہانی دہشت گردی کن کاریم اٹ اتنگپک و ہراڑان اوغانستان اٹی چل سال آن برجاجنگ چٹنگ مریک۔ اوداہیت ءِ ہم تالان کرے کہ اوغانستان اٹی امن ڈیہہ نا غٹ ملک آتے فائدہ ایتک۔
