پاکستان ءُ عمان ءِ نیام ءَ دو نیمگی تجارت ءِ دیمروئی ءِ واستہ مزنیں موہ است انت، اقتصادی چست ءُ ایر ءُ سرمایہ کاری ءِ دیمروئی ءِ واستہ مدام رابطہ ءُ شور ءُ سلاہ المی انت، نائب مزن وزیر محمد اسحاق ڈار

اسلام آباد۔14اکتوبر  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان ءُ عمان ءِ نیام ءَ دو نیمگی تجارت، اقتصادی چست ءُ ایر ءُ سرمایہ کاری ءِ دیمروئی ءِ واستہ مزنیں موہ است انت، ایشی ءَ چہ سیت چست کنگ ءِ واستہ مدام رابطہ ءُ باقاعدہ مشورہ ءِ ضلورت انت۔ پاکستان ءُ عمان ءَ دمگی امن ءِ واستہ سرگرمیں کرد پیلو کنگ ءُ برجاھیں جیڈھ آنی گیواری ءِ واستہ یکجائی کوشست آناں برجاہ دارگ لوٹ ایت۔ عمان ءِ دری کارانی وزیر سید بدر بن حمد بن حمود البسئیدی ءَ دمگی گپ ءُ تران ءُ سفارتکاری ءِ دیمروئی ءِ تہ ءَ پاکستان ءِ جوڑیشت ءِ کرد ءَ را ساڑات ءُ گوشت کہ دمگ ءَ امن ءِ برجائی ءِ واستہ پاکستان ءِ کوشست ستا کرز اَنت۔ اے ھیالانی درشانی آئی ءَ پاکستان ءُ عمان ءِ یکجائی وزارتی کمیشن ءِ ھشتمی دیوان ءَ بنداتی گشتانک ءِ ساھت ءَ کت۔ نائب مزن وزیر ءَ عمان ءِ دری کارانی وزیر ءُ آئی ءِ ڈل ءَ را پاکستان ءَ سر بوھگ ءِ پد ءَ وش آتک کت ءُ صدر ءُ پاکستان ءِ مزن وزیر ءِ نیمگ ءَ عمان ءِ سلطان ءِ واستہ نیکیں واھگ آنی درشان کت۔ آئی ءَ گوشت کہ پاکستان ءُ عمان ءِ نیام ءَ یکجائی وزارتی کمیشن ءِ دیوان 7سال ءَ پد بوھگ ءَ انت، دوئیں ملک آنی نیام ءَ اے گپ ءِ سر ءَ تپاک کنگ بوتگ کہ آیوکیں دیوان آنی نیام ءَ چینچو دراجیں کش ءُ گوری مہ بیت تانکہ تجارت، اقتصادی چست ءُ ایر ءُ سرمایہ کاری ءِ موہ آناں سرجمی ءَ پائدگ زورگ بہ بیت۔ سینیٹر محمد اسحاق ڈار ءَ گوشت کہ دوئیں ملک آنی نیام ءَ محدود تک ءِ گند ءُ نند ءَ دو نیمگی دلچسپی ءِ جتا جتائیں پڑ ءُ جھان ءُ دمگی جیڈھ آنی سر ءَ سرجمیں رنگ ءَ گپ ءُ تران کنگ بوتگ، ایشی ءِ تہ ءَ امریکہ ءُ ایران ءِ جنگ، آبنائے ہرمز، باب المندب، فلسطین، غزہ ءُ جموں ءُ کشمیر ءِ ھواریں دمگ ءِ دگہ ھاسیں جیڈھ آنی سر ءَ گپ ءُ تران کنگ بوتگ۔ آئی ءَ مسلم امت ءِ نیام ءَ دمگی امن ءُ ایمنی ءِ دیمروئی ءِ واستہ عمان سروکی ءِ کوشست آناں ساڑات ءُ گوشت کہ پاکستان اے کوشست آناں من ایت۔ آئی ءَ گوشت کہ عمان ءِ سروکی ءِ کوشست آناں ذاتی رنگ ءَ ساڑات آں ءُ زاناں کہ اے مول ءُ مراد ءِ واستہ چنچو محنت کنگ بوتگ۔ نائب مزن وزیر ءَ گوشت کہ پاکستان ءُ خلیج کوآپریشن کونسل ءِ نیام ءَ سیادی وتی رنگ ءَ بے درور انت۔ دوئیں ملک اسلامی کمک ءِ گل، اقوام متحدہ ءُ دگہ کثیر نیمگی ادارگ آنی باسک اَنت ءُ جتا جتائیں جیڈھ آنی سر ءَ نزیکی ءُ ھمکاری کن اَنت۔ آئی ئَ گوشت کہ پاکستان ئُُ عمان ئِ نیام ئَ سفارتی سیادی ئِ برجائی ئَ 55سال بوتگ، البت دوئیں ملک آنی نیام ئَ سیادی ئِ بُن ھشت سداں سال ئِ یکجائی راجدپتر، مہر ئُُ وت مہ وتی احترام ئِ سر ئَ اِنت۔ سینیٹر محمد اسحاق ڈار ءَ گوشت کہ پاکستان ءُ عمان ءَ را دمگی امن ءِ واستہ سرگرمیں کرد پیلو کنگی انت ءُ برجاھیں جیڈھ آنی گیواری ءِ واستہ یکجائی کوشست آناں برجاہ دارگی انت۔ خطہ ءِ تہا تناؤ ءِ سبب ءَ مشکل پدر انت ءُ پاکستان ءَ ہوار سرجمیں دگنیا ءَ انرجی سپلائی چین ءِ سرا اثر کپتگ۔ نائب مزن وزیر ءَ گوشت کہ خطہ ءَ امن ءُ ایمنی ءِ بحالی وھد ءِ ضلورت انت ءُ اے رد ءَ پاکستان ءُ عمان ھاسیں کرد پیلو کت کن انت۔ آئی ءَ گوشت کہ عمان ءَ بھارت ءُ پاکستان ءِ میان ءَ جنگ ءَ ھوار جتا جتائیں جھان ءِ جیڈھ آنی سر ءَ پاکستان ءَ مدام رابطہ کتگ وھدیکہ پاکستان اومان ءِ سروکی ءَ را ھم جاور ھال آنی بابت ءَ سرپد کنت۔ آئی ءَ منیلا ءَ وتی پیسریگیں گند ءُ نند ھم وشیں گند ءُ نند لیک اِتگ۔ آئی ءَ 2027 ءَ عمان ءِ تر ءُ تاب ءِ جار جتگ کہ اودا دوئیں ملک آنی یکجائی وزارتی کمیشن ءِ آیوکیں دیوان بیت۔ اے موہ ءِ سر ءَ عمان ءِ دری کارانی وزیر سید بدر بن حمد بن حمود البوسعیدی ءَ وتی ڈل ءِ اسلام آباد ءَ آیگ ءِ سر ءَ وشی ءِ درشان کت ءُ گوشت کہ پاکستان ءُ عمان ءِ نیام ءَ راجدپتر، دود ءُ ربیدگ ءُ وت مہ وتی نزیکی ءِ مھکمیں سیادی است انت۔ آئی ءَ گوشت کہ پاکستان ءُ عمان ءِ نیام ءَ دو نیمگی سیادی آنی مول ءُ مراد جتاجتائیں شوبگ آنی تہ ءَ کمک ءِ دیمروئی ءُ دوئیں ملک آنی الس آنی واستہ گیشاں چہ گیش آسراتی ءِ واستہ موہ پیداک کنگ انت۔ عمان ءِ دری کارانی وزیر ءَ گوشت کہ پاکستان ءُ عمان ءِ یکجائی وزارتی کمیشن ءِ ھشتمی دیوان دو نیمگی کمک ءَ را دیم ءَ برگ ءِ یک ھاسیں وسیلگ انت۔ دوئیں ملک آنی سروکی ءَ یکجائی ءَ گیش باقاعدگی ءَ گند ءُ نند کنگ ءِ جزم کتگ۔ باہمی گند ءُ نند ءُ رابطہ آنی تہ ءَ گیشی ءَ چہ دوئیں ملک آنی سروکی ءُ الس آنی توقعات آناں پیلو کنگ ءِ واستہ گیش موثر پیشرفت ممکن بیت۔ آئی ءَ دمگی تک ءَ گپ ءُ تران ءُ سفارتکاری ءِ دیمروئی ءِ واستہ پاکستان ءِ جوڑیشت ءِ کرد ءَ را ساڑات ءُ گوشت کہ اے وھد ءَ کہ کش ءُ چیل ءِ تہ ءَ گیشی ءِ ھترہ است انت، رابطہ، گپ ءُ تران ءُ وت مہ وتی مٹی ءِ دیمروئی ءِ واستہ کوشست ارزشت دار انت۔ آئی ءَ گوشت کہ گوستگیں ماھ آنی ساھت ءَ پاکستان ءِ نیمگ ءَ کتگیں کوشست آناں ساڑات آں ایشی ءَ چہ ھاسیں رنگ ءَ ایران ءُ امریکہ ءِ نیام ءَ گپ ءُ تران ءِ واستہ گنجائش جوڑ کنگ ءَ کمک رستگ۔ عمان ءِ وزیر ءِ درئی کار ءَ گند ءُ نند ءِ تیاری ءَ دوئیں ملک آنی حکام ءِ محنت ءُ کوشست آناں من اِت ءُ شگر ءُ منت گپت۔ آئی ءَ گوشت کہ اقتصادی کمک ءِ سر ءَ ھاسیں دلگوشی دیگ لوٹ ایت چیاکہ پاکستان ءُ عمان دوئیں مزنیں اقتصادی بدلی ءِ عمل ءَ چہ گوزگ ءَ اَنت ءُ تجارت، رسد ءِ مھکم کنگ ءِ ضلورت اِنت۔ آئی ءَ امیت سہرا کت کہ یکجائی وزارتی کمیشن ءِ دیوان دوئیں ملک آنی نیام ءَ بامردیں دیمروئی ءُ عملی کمک ءِ دیمروئی ءِ واستہ یک جوانیں پلیٹ فارم ءِ ثابت بیت۔