قیمتی سنگ آنی برآمدات ءَ را گیش کنگ ءِ واستہ موثر گامگیج چست کنگ بہ بنت، منصوبگ آنی تہ ءَ دیر کنگ برداشت کنگ نہ بیت، مزن وزیر شہباز شریف

اسلام آباد۔14اکتوبر  (اے پی پی): مزن وزیر محمد شہباز شریف ءَ قیمتی سنگ ءُ نگینہ  آنی پائلٹ پروجیکٹ ءِ تیاری ءِ تہ ءَ سست ءُ شوبگ ءِ دیمروئی ءِ واستہ گامگیج آنی تہ ءَ جمود ءِ سر ءَ زھر ءُ زاری ءِ درشان کنان ءَ اولویت ءِ بنیاد ءَ یک ھاسیں ٹائم فریم ءِ گوما یک ایکشن پلان ءِ جوڑ کنگ ءُ پیش کنگ ءِ ہدایت کتگ۔ چار شمبے ءِ روچ ءَ مزن وزیر محمد شہباز شریف ءِ سروکی ءَ گران بہائیں سنگ ءُ گوھر شوبگ ءِ دیمروئی ءُ ایشی ءِ برآمدات ءَ را گیش کنگ ءِ گامگیج آنی ھوالگ ءَ چار ءُ تپاسی دیوان برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ دیوان ءَ گوں گشتانک دیان ءَ گوشت کہ قیمتی سنگ ءُ جواہر ءِ شوبگ ءِ دیمروئی ءِ ھوالگ ءَ گامگیج اولی ترجی اِنت، اے ھوالگ ءَ ھچ وڑیں سست ءُ سستی منگ نہ بیت۔ آئی ءَ ہدایت کت کہ قیمتی سنگ آنی کان کنی ءُ کٹائی ءِ وسیلگ ءَ قدر ءُ قیمت ءِ گیشی ءِ سرجمیں ماحولیاتی نظام جوڑ کنگ بہ بیت۔ مزن وزیر ءَ گوشت کہ گران بھائیں سنگ آنی نا معیاری کان کنی ءُ اسمگلنگ ءِ سبب ءَ ملک ءَ را سالے ارباں ڈالر ءِ تاوان برداشت کنگی اِنت۔ اللہ تعالیٰ ءَ پاکستان ءَ را قدرتی وسائل ءِ دولت ءُ مال ءُ مڈی ءَ چہ نعمت داتگ ۔ مزن وزیر ءَ پرمان داتگ کہ گران بھائیں سنگ ءُ معدنیات ءِ مزنیں ذخائر ءَ چہ برآمدات ءَ را گیش کنگ ءِ واستہ اولیت ءِ بنیاد ءَ گامگیج چست کنگ بہ بیت، خطہ ءِ ایندگر ملک آنی وڑ ءَ گران بھائیں سنگ ءُ نگین آنی واستہ برانڈ پاکستان ءِ سر ءَ کار کنگ بہ بیت ءُ ارزشت ءِ گیشی ءِ واستہ سنٹر آف ایکسیلنس ءِ زوت جوڑ کنگ ءِ منصوبگ جوڑ کنگ بہ بیت۔ مزن وزیر ءَ پائلٹ پراجیکٹس ءُ گران بھائیں سنگ آنی ماڈل کان آنی جوڑیشت ءِ واستہ توامیں رکاوٹ آناں دور کنگ ءُ منصوبگ آناں زوت سرجم کنگ ءِ ہدایت کت۔ گند ءُ نند ءَ مزن وزیر ءَ را گران بھائیں سنگ آنی ویلیو ایڈیشن ءَ چہ پد برآمد کنگ ءِ واستہ پٹ ءُ پول، کٹائی ءُ برآمد کنگ ءِ واستہ تیاری ءِ واستہ پائلٹ پروجیکٹ ءِ دیمروئی ءِ بابت ءَ سرجمیں بریفنگ دیگ بوت۔ دیوان ءَ گوشگ بوت کہ حسین آباد اسکاردو ءَ سینٹر آف ایکسیلنس منصوبگ ءِ واستہ 4.8کنال زمین ءِ ٹرانسفر کنگ بوتگ، منصوبگ ءِ واستہ فنڈز دستیاب انت ءُ ایشی ءِ جوڑیشت زوت بندات کنگ بیت۔ دیوان ءَ را گیش سرپدی دیگ بوت کہ آزات جموں ءُ کشمیر ءُ اسلام آباد ءَ اے منصوبگ ءِ واستہ زمین ءِ نشاندہی کنگ بوتگ ءُ اسلام آباد ءَ سینٹر آف ایکسیلنس ءِ جوڑ کنگ ءَ تاں یک متبادلیں جاہ ءَ سرجمی ءَ کار کنگ بیت۔ دیوان ءَ اے شوبگ ءِ دیمروئی ءِ واستہ پالیسی گامگیج آنی بابت ءَ ھم سرپدی دیگ بوت، ایشی ءِ تہ ءَ ھال دیگ بوت کہ گران بھائیں سنگ ءُ نگین آنی واستہ پجارینگ بوتگیں دمگ آنی جیولوجیکل میپنگ سرجم کنگ بوتگ، ایشی ءِ تہ ءَ گلگت بلتستان ءُ کٹون خوابر ءُ کٹونخی ءَ قیمتی سنگ آنی درگیجگ ءِ ھوالگ ءَ گیشیں کار آنی واستہ 8 نوکیں بلاک ءِ پجار کنگ بوتگ۔ دیوان ءَ داتگیں بریفنگ ءِ رد ءَ پبلک سیکٹر ڈویلپمنٹ ءِ چیر دستی ءَ اے سال ءَ شوبگ ءِ دیمروئی ءِ واستہ یک ارب کلدار ایر کنگ بوتگ۔ برآمد کنوک آناں آسراتی ءِ واستہ 7شھر آنی تہ ءَ 10بانک آنی 80 شاخ آنی تہ ءَ برآمدات ءِ آسراتی ءِ میز جوڑ کنگ بوتگ۔ مزن وزیر ءَ گرانبہاہی سنگ ءُ گوھر آنی واستہ سنٹر آف ایکسیلنس ءِ جوڑیشت ءِ واستہ یک ٹوھیں ایکشن پلان ءُ آیوکیں ھپتگ ءَ شوبگ ءِ دیمروئی ءِ واستہ گامگیج آنی تیاری ءُ پیش کنگ ءِ ہدایت کت۔ گند ءُ نند ءَ وفاقی وزیر جام کمال خان، ڈاکٹر مصادق مسعود ملک، احد خان چیما، احسن اقبال، عطا اللہ تارڑ، علی پرویز ملک، مزن وزیر ءِ مشیر ہارون اختر، وزیر ءِ مملکت بلال اظہر کیانی ءُ ہمگرنچیں مزنیں حکام ءَ بہر زرتگ۔