اسلام آباد۔ 06دسمبر (اے پی پی) صدر مملکت ڈاکٹر عارف علوی حکومت و ذرائع ابلاغ تون اوار راج انا غٹ تپہ غاتیا زور شاغانے کہ او چناتون بیدادی نا توننگ کن تینا جوان کڑد ءِ ادا کیر وخت ا س کہ اسہ وڑ وارخواہی تا فراوانی نا کمک اٹ چوری و نادار چناتا شرحالی کن ہروڑگام گیج چست کننگ نا گرج ءِ۔ اوداہیت ءِ پنچ شنبے نادے داڑے پاکستان بیت المال نا کنڈان تھیلیسیمیا سینٹر اٹی چناتا جہانی دے انا دود آن تران کرسا پارے۔ دود اٹی خاتون اول ثمینہ علوی، ایم ڈی بیت المال عون عباس، اسپیشل سیکرٹری کابینہ ڈویژن شائستہ سہیل و کیہی شار تا سویٹ ہوم تیان بروک آ چناتا بھلو کچ اس ساڑی ئسر۔ دود اٹی چناک سلامی پریڈ پیش کریر وخت اس کہ چناتون بیدادی، چائلڈ لیبر نا سرحال آتیا پرفارمنس نا مظاہرہ ءِ کریر۔ صدر پارے کہ پوسکن آ پاکستان نا مسخت اسہ ہند ن ءُ راج اسے نا ٹہیفنگ ءِ ہراڑے ہر چناءِ تعلیم، جان جوڑی و روزگار تون اوار غٹ زند انا بشخ آتے ٹی بریبر وارخواہی دوئی مرے۔ صدر مملکت داکان مست تھیلیسیمیا سینٹر نا چندی بشخ آتا ہم دورہ ءِ کرے و تھیلیسیمیا نا مریض آتے درمان کن فنڈ انا فراوانی کن بیت المال نا کوشست آتا ستاءِ کرے۔
