اسلام آباد۔ 06دسمبر (اے پی پی) وزیراعظم عمران خان پارینے کہ اوغانستان اٹی سیاسی مذاکراتی عمل نا کمک اٹ امن نا بابت پاکستان نا موقف پک مسنے، اوغانستان اٹی امن کن نن مدام مذاکرات و پرامن تصفیہ آ زورشاغان، اینو ’’ڈومور‘‘ نا خواست انا جاگہ غا اوغانستان نا پرامن ایسری اس پٹنگ اٹی ننا کمک ءِ خواہنگ انگ ءِ ، داسہ پین کس اِنا جنگ ءِ کننگ نا جاگہ غا پاکستان ثالثی نا کمک اٹ تصفیہ ٹی تینا کڑد ءِ ادا کیک، یمن اٹی امن نا بابت ہم تینا کڑد ءِ ادا کننگ نا پورو کوشست کینہ، غٹ مذہب نا خلقت ءِ اوفتا عبادت گا ہ تسکان رسینگ فراوان کننگ پاکستان نا زمواری ءِ۔ سکھ برادری کرتار پور راہداری نا بھاز ستاءِ کرینو اومیت ءِ کہ بھارت ہم مثبت ورندی ایتک، اگہ اقتصادی حالیت آک واقعی خراب مسرہ تو ملک اٹی درملکیک زرکاری کننگ کن بتورہ، مشکل حالیت آتا باوجود ننا معاشی ٹیم کارکڑد نشان تس۔ اوداہیت ءِ پنچ شنبے نادے وزیراعظم آفس اٹی بنجائی کابینہ نا دیوان نا کماشی ءِ کرسا پارے۔ وزیراعظم پارے کہ امریکہ داہیت ءِ اولیکو وار امنا کرینے ، ہرا پاکستان تحریک انصاف مدام پارسا کرینے، کہ اوغانستان نا ویل انا ہچ ءُ فوجی ایسری اس اف۔ وزیراعظم یات ترفے کہ اوغانستان اٹی امن نا بابت اوغان مصالحت کن امریکی نمائندہ خصوصی زلمے خلیل زاد تون اونا اوڑدہی مس و اودے خوشی مس کہ تحریک انصاف نا موقف ءِ امنا کننگانے۔ اوپارے کہ امریکہ سیاسی تصفیہ نا کمک اٹ اوغانستان اٹی امن و مصالحت نا دوئی کننگ اٹ پاکستان نا دیر پا فائدہ غاتا اعتراف ءِ کرینے۔ نن 15سال آن پارینہ کہ اوغان ویل انا فوجی ایسری اف، کنے خوشی ءِ کہ امریکہ داہیت ءِ امنا کرینے۔ پاکستان اوغانستان اٹی امن کن تینا کڑد ءِ ادا کننگ ءِ۔ ای مدام پہہ مسوٹہ کہ ننا کڑد اوغانستان اٹی مذاکرات نا کمک اٹ امن نا بابت آن ءِ و ننا دا موقف مسنے کہ اوغانستان اٹی مذاکرات نا کمک اٹ ویل انا سیاسی ایسری اس پٹنگے۔ اللہ نا شکرءِ کہ اینو ’’ڈومور‘‘ نا خواست انا جاگہ غا اوغانستان نا پرامن ایسری اس پٹنگ اٹ ننا کمک ءِ خواہنگ انگ ءِ۔ وزیراعظم پارے کہ نن مدام اوغانستان نا مذاکراتی و پرامن تصفیہ غا زور شاغان و داسہ پین کس اسے نا جنگ ءِ کننگ نا جاگہ غا پاکستان ثالثی نا کمک اٹ تصفیہ ٹی تینا کڑد ءِ ادا کیک۔ یمن نا حالیت آتا بارواٹی وزیراعظم پارے کہ اونا حکومت یمن نا تنکی نا ثالثی نا کمک اٹ ایسری اس پٹنگ اٹ تینا کڑد ءِ ادا کننگ نا خواہندار ءِ۔ یمن اٹی امن نا بابت ہم تینا کڑدءِ ادا کننگ نا پورو کوشست کینہ۔ کرتار پور راہداری ملنگ نا بابت وزیراعظم عمران خان پارے کہ بدقسمتی اٹ بھارت خیر سگالی نا ننا داجوزہ ءِ سیاسی فائدہ دوئی کننگ نا رنگ تس۔ اوپارے کہ ننا مخالف آک خراب حالیت آتے پارہ ولے ایلو کنڈ بھلو کچ اسے آ زرکاری بننگ ءِ، اگہ اقتصادی حالیت آک واقعی خراب مسرہ تو ملک اٹی درملکیک زرکاری کن بتورہ۔ اودارداٹ سوزوکی نا کنڈان 450 ملین ڈالر، کوکاکولا نا کنڈان 200 ملین ڈالر، پیپسی نا کنڈان 400 ملین ڈالر، ایگزن موبائل کمپنی نا کنڈان دمدستی وڑاٹ 200 ملین ڈالر و جے ڈبلیو فور لینڈ انا کنڈان 900 ملین ڈالر نا زرکاری نا عندیہ نا ذکر ءِ کرے۔ اوپارے کہ فور لینڈ کمپنی پاکستان اٹی کار تا پورو مینو فیکچرنگ نا پلانٹ اس خلیک ہرا پاکستان اٹی تینا وڑانا اولیکو ڈٹ ءِ، داکارندہ غاتا تربیت کن تکنیکی ادارہ اس ہم جوڑ کیک ہرا ملک اٹی صنعت کاری نا کنڈا اسہ بھلو گام اسے، وزیراعظم پارے کہ ملک اٹی درملکی زرکاری ءِ اتنگ نا اونا کوشست آتا سہرا اقتصادی ٹیم ءِ ملک۔
