اقوام متحدہ۔ 06دسمبر (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی سی پیک ءِ ساؤتھ ساؤتھ کواپریشن نا شاندار مثال اس گوندسا پارے کہ داڈٹ انا فائدہ غاک بیرہ تعلقدار ملک آتسکان محدود افس بلکن مچ آ ڈیہہ و اوڑان پیشن نا خلقت کن ہم ارے، جنرل اسمبلی نا بڑزکو کہول انا دیوان اٹی گپ و تران کرسا اوپائیدار شونداری نا ہدف آتا دوئی کننگ اٹ متوسط کٹیا کروک ملک آتا قائدانہ کڑد ءِ تالان کرے۔ اوپارے کہ پائیدار شونداری نا ہدف آتیان خاص وڑاٹ نیزگاری ٹی کمتی نا ہدف آتے دوئی کننگ اٹ متوسط کٹیا کروک ملک آتے قائدانہ کڑد تننگ تون اوار اوار اوفتیا وام تا بھاریم پائیدار بنداو تیا کم کننگ کن اوفتا کمکاری ءِ ہم کننگے۔ جہانی جی ڈی پی ٹی متوسط کٹیا کروک ملک آتا بشخ کم و ود نصف ءِ ولے 73 درسد نیزگار خلقت ہندا ملک آتے ٹی رہینگ انگ ءُ۔ پائیدار شونداری نا ہدف آتا ایجنڈا غا عملدرآمد اٹی متوسط کٹیا کروک ملک آتے مون تروک اڑاند آتیا شرہ ٹی خیال آتا درشانی ءِ کرسا پاکستانی مندوب پارے کہ اگرچہ متوسط کٹیا کروک ملک آتے مون تروک چیلنج آک مشترک ءُ ولے نیزگاری نا کچ، قدرتی وسیلہ، شونداری نا کچ و اقتصادی و راجی کارکڑد نا لحاظ اٹ اوفتا واضح پرخ ہم ساڑی ارے ہنداخاطران داغٹ انا شونداری نا حکمت عملی اسہ وڑ مننگ کپک۔ اقوام متحدہ نا کنڈان دُن انگا ملک آتا کمک ءِ اوفتا گرج آتے مون آ تخسا بایدے کروئی مرے۔ داوخت آ صدر جنرل اسمبلی ماری ۔آ فرنانڈاایسپینوزاو اینٹی گوااینڈ باربوڈا نا وزیراعظم الفانسوبراؤن ئسک ہم تینا خیال آتادرشانی ءِ کریر۔
