اسلام آباد۔5دسمبر(اے پی پی) مزن وزیر عمران خان ءَ پاکستان ءَ جاپانی زرکارانی دلبڈ ی کتگءُ گشتگ کہ دوئیں ملک اَں بیپاری، زرکاری، انفراسٹرکچر ءِ پڑاں کمک ءَ را گیش کنگءِ ضرورت ایں۔ آئیءَ اے گپ جاپان ءِ مزن وزیر ءِ راجی سلامتیءِ صلہ کار کینتارو سونورا ءَ گوں گپءُ تران کنانءَ کتگ کہ آہاں چارشمبے ءِ روچءَ مزن وزیر کارگسءَ گندءُ نند کتگ۔ راجی سلامتی ءِ صلہ کار ءَ پاکستان ءُ جاپان ءِ نیامءَ دونیمگی سیادی ءَ را گیش کنگءِ وائشت ءِ درشانی کتگءُ ناشرکاریءِ حلاپءِ جنگءَ پاکستانءِ کردءَ راساڑاتگ۔ مزن وزیر ءَ راجی سلامتی ءِ صلہ کار ءُ آئی ءِ ڈل ءَ را وش اَتک کتگءُ دوئیں ملک آنی نیامءِ سیادی ءَ را ساڑاتگ۔ آئیءَ جاپانی اُلس ءِ جوشءُ جزبگءَ را ساڑاتگ۔ دیمروئی ءُ زرکاری شریدار بوہگءَ جاپان ءِ ارزشتءَ را پدر کتگءُ مزن وزیرءَ دوئیں ملک آنی نیامءَ جوانیں سیادی ءِ سرءَ سدکی ءِ درشانی کتگ۔ مزن وزیر ءَ پاکستان ءَ جاپانی زرکاراناں دلبڈی داتگءُ گشتگ کہ پاکستان معدنیاتءِ واجہ ایں، ملک ءَ بازیں اقتصادی موہ اَست۔ آئیءَ گشتگ کہ ایشیاءءَ جاپانی بیپار ءِ ہوالگءَ ’’ جیٹرو‘‘ سروے ءَ جوانیں کٹءُ کمائی ءُ بانداتءَ بیپارءِ ہوالگءَ پاکستانءَ را یک ہاسیں ملکے لیکگ بوتگ۔
