اسلام آباد۔ 05دسمبر (اے پی پی) وزیر خارجہ شاہ محمود قریشی پارینے کہ پاکستان اوغان اوغان سرکڑدہ ہی ٹی مروک آ مصالحتی کوشست آتا مدام مخ تفی ءِ کرینے۔ پاکستان و اوغانستان نا نیام اٹ مذہبی، تہذیبی و تریخی ہم گرنچی ءِ۔ اوغان مہاجر آتا چناتا تعلیم پاکستان نا اولیت آتے ٹی اوار مسنے۔ داہیتءِ او اوغان مہاجر کیمپ آتے ٹی رہینگوک طالب علم آتا شرف اٹی وزارت خارجہ ٹی خصوصی دودآن تران کرسا پارے۔ وزیر خارجہ اوغان مہاجر کیمپ آتے ٹی رہینگوک طالب علم آتے ٹی ٹیکی ہم بشخ وپانٹ کرے۔ دود اٹی سیکرٹری خارجہ تہمینہ جنجوعہ، سیکرٹری سیفران، پاکستان اٹی تعینات چین نا سفیر، اوغان ناظم الامور و یو این ایچ سی آر نا نمائندہ غاک ساڑی ئسر۔ ٹیکی نا بست وبند ءِ پاکستان و چین نا اواری اٹ ’’پاک چین اوغانستان سہ باسکی کمکار‘‘ نا رداٹ کننگا۔ وزیر خارجہ شاہ محمود قریشی ساڑی مروک آتیان تران کرساپارے کہ پاکستان و اوغانستان نا نیام اٹ مذہبی ، تہذیبی و تاریخی ہم آہنگی ءِ، ہڑتوم آ ملک آتا باتی تا نیام اٹ رابطہ ننا ہڑتوم آ کنڈآتا تعلقداری تا بنداوی تمبہ ءِ۔ وزیر خارجہ پارے کہ ننا حکومت اوغانستان تون ہڑتوم آ کنڈآتا تعلقداری تے خاص اہمیت ایتک۔ ڈیہہ نا شونہال، سوگو و پرامن آخبت کن ننا اواری اٹ کاریم کننگ بھاز المی ءِ۔ وزیر خارجہ پارے کہ اینو ہراتم نن دا بشخندہ کروک آ دروشم و اوفتا خن تا چمک ءِ ہریوہ تو کنے تینا خلقت نا میزبانی آ فخر محسوس مریک ہرانا مظاہرہ دا کم وسیلہ غاتا باوجود تینا اوغانی ایڑھ و ایلم تے کن گدرینگوک آ چار دہائی تیان کرسا بننگ ءُ۔ اوغان مہاجر چناتا تعلیم ننا اولیت آتے ٹی اوار مسنے، ننے فخر ءِ کہ 50 ہزار اوغان شاری پاکستان آن تعلیم حاصل کننگ آن پد اینو اوغانستان اٹی خذمت سرانجام تننگ ءُ، نن پاکستان نا چندی بھلا یونیورسٹی تے ٹی تعلیم حاصل کننگ کن 6000 اوغان طالب علم ءِ وظیفہ تسنے۔ اوغانستان و پاکستان نا نیام اٹ تعلقداری و سنگتی نا اہمیت ءِ تالان کرسا وزیر خارجہ پارے کہ اونا وزیر خارجہ نا وڑاٹ اولیکو دورہ کابل نا ئس انتئے کہ نن تین پہ تینی واپار نا کمک اٹ تعلقداری تے پین مون آ دننگ نا خواہندار اُن۔ وزیر خارجہ پارے کہ پاکستان تینٹ دہشت گردی نا عفریت تون مون تسنے ہنداخاطران نن دا تکلیف ءِ پہہ مرینہ ہراڑان ننا اوغان ایلمک گدرینگوک آ چار دہائی آن گدرینگ انگ ءُ۔ نن مدام اوغان سرکڑدہ ہی ٹی مروک آ مصالحتی کوشست آتا مدام مخ تفی ءِ کرینن و کرسا کینہ۔ اوپارے کہ ننا قوم دہشت گردی نا برخلاف جنگ کننگ نا عزم ءِ کرینے۔ اواوغان طالب علم آتا حوالہ ءِ ترسا پارے کہ داچناک ننے ہندن دوست ءُ دن کہ ننا تینا چناک انتئے کہ دا چناک داکان تعلیم حاصل کننگ آن پد اوغانستان اٹی ننا سفیر نا کڑد ءِ ادا کیرہ۔ وزیر خارجہ مخدوم شاہ محمود قریشی اوغان چناتے ٹی ٹیکی ہم بشخ وپانٹ کرے و اوفتے تون عکس ہم کشفے۔
