اسلام آباد۔ 05دسمبر (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ ساڑی آ حکومت ہندی کہول آ بڑزکو تعلیمی ادارہ غاتا اسہ نیٹ ورک اس جوڑ کرسا السی آسراتی تے ٹی ودکی نا کسر آ روان ءِ، وژن 2025 ء ٹی تعلیمی شونداری ءِ اولی حیثیت تننگانے و پاکستان نا غٹ ضلع غاتا کہول آ یونیورسٹی سب کیمپس آتا جوڑ کننگ علاقائی شونداری نا کسر آ اسہ ہم ءُ گام اس جوڑ مریک ، مچ آ ملک اٹی تعلیم نا بشخ ءِ گچین جوڑ کننگ کن ساڑی آ حکومت ملک اٹی اسہ وڑ نصاب رائج کننگ آ عمل کننگ ءِ۔ داخیال آتا درشانی ءِ او تدوک آدے سنٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی بنجائی وزارت و صوبائی محکمہ غاتا بڑزکو کمامدارآک ساڑی ئسر۔ دیوان اٹی تعلیم، ذرائع ابلاغ و علاقائی شونداری نا بابت ڈٹ آتے پیش کننگا۔ سی ڈی ڈبلیو پی نا دیون اٹی ایجوکیشن ڈویژن نا کنڈآن 2 ڈٹ پیش کننگا، ہراٹی اولیکو ڈٹ پائیدار شونداری نا مسخت آتا دوئی کننگ کن بنجائی دارالحکومت ، گلگت بلتستان ، فاٹا و آزاد کشمیر نا ہندی کمیونٹی ءِ بنداوی تعلیم نا آسراتی فراوان کننگ و تعلیمی بشخ انا بابت انسانی شونداری نا انڈیکیٹرآتے گچین جوڑ کننگ اٹ کمک تننگ کن 2 ارب 60 کروڑ روپئی جتا کننگا ہرافتے دیوان اٹی منظور کننگا۔ مچ آ ملک اٹی بنداوی تعلیمی اسکول آتا جوڑ کننگ کن ایجوکیشن ڈویژن نا کنڈان 4 ارب 5 کروڑ 7 لکھ روپئی نا خڑچ انا ڈٹ پیش کننگا ہرافتے مستی منظوری کن ایکنک آ گدریفنگا۔
