کانفرنس اٹی 6ملک آتا پارلیمانی ڈل آک بشخ ہلیرہ، کانفرنس نا کماشی ءِ پاکستان نا کنڈان ایران ءِ تننگک
اسلام آباد۔ 05دسمبر (اے پی پی) اسپیکر قومی اسمبلی اسد قیصر دہشت گردی نا برخلاف گام گیج آتا بابت اڈ ہلوک آ کانفرنس اٹی بشخ ہلنگ کن (اینو) پنچ شنبے نادے آ تہران آ رادہ مریک۔ ایران نا سرکاری نیوز ایجنسی نا رداٹ دہشت گردی نا برخلاف گام گیج آتا بابت اولیکو کانفرنس گدرینگوک آ سال اسلام آباد اٹی اڈ ہلکوسس۔ تہران اٹی مروک آ دا ارٹ میکو کانفرنس مریک۔ اسپیکر قومی اسمبلی اسد قیصر پاکستان نا پارلیمانی ڈل انا کماشی ءِ کیک۔ کانفرنس اٹی 6ملک آتا پارلیمانی ڈل آک بشخ ہلیرہ۔ جمعہ و ہفتہ نادے اڈ ہلوک آ کانفرنس نا کماشی ءِ پاکستان نا کنڈان ایران ءِ تننگک۔ کانفرنس اٹی ایران، پاکستان، روس، چین، اوغانستان و ترکی نا پارلیمنٹرین آک بشخ ہلیرہ۔ کانفرنس نا اڈتننگ نا مسخت دہشت گردی نا خلیس آتا برخلاف گام گیج آتا بابت ڈیہہ نا ملک آتا نیام اٹ اشتراک کار ءِ مربوط کننگ ناءِ۔ کانفرنس نا اڈتننگ آن ڈیہہ نا ملک آتا نیام اٹ علاقائی کمکاری ودک۔
