راولپنڈی۔ 05 دسمبر (اے پی پی) بنجائی وزیر ریلوے شیخ رشید احمد پارینے کہ ریلوے نا نسخان ءِ چٹفنگ کن سالانہ دہ ارب روپئی کٹیا دوئی کننگ نا ہدف ءِ تخنگانے، ریلوے نا سرسہبی سی پیک ڈٹ اکن فائدہ مند جوڑ مریک، کوئٹہ غان کراچی کن زوت اِراپوسکن ءُ ٹرین بناکننگک۔ ریلوے ہسپتال آتے ٹی درمان نا گچین آسراتی تننگک تانکہ ریلوے ملازم آک تینا گچین درمان ءِ کرفنگ کیر۔ او چارشنبے نادے ریلوے ہسپتال راولپنڈی ٹی پوسکن آ لیب انا بناءِ کننگ نا وخت آ ہیت وگپ کریکہ۔ اوپارے کہ دُوانزدہ سال مست ہراڈٹ انا بناءِ کننگا ہموسلوک ءِ، ریلوے ٹریک نا حالیت خراب ءِ ہرادے گچین کننگ کن خلقت ءِ بھرتی کننگ انگ ءِ۔ شیخ رشید احمد پارے کہ او اسہ روپئی اس خلنگ آن بیدس 10 ٹرین چلیفینے و پین ٹرین ہم چلیفک۔ خواہش ءِ کہ ایم ایل ٹو و تھری انا ہم بناءِ کین۔ ریلوے نا شونداری آن ہی سی پیک ءِ سرسہبی ملک، پاکستان ریلوے 65 درسد آبادی آن گدرینگ انگ ءِ، کوشست مریک کہ نالہ لئی آ ریلوے ٹریک شاغنگے۔ اوپارے کہ اسہ دے اٹی 9 کروڑ 70 لکھ روپئی نا تاریخی کٹیا مسنے، ریلوے نا کرایہ غاتے ٹی ودکی کرینن ولے 100 ٹرین ءِ ہم داسکان دوخلتنون ، 10 ارب نا کٹیا اسکان سرمرینہ، مال بردار گاڈی تا بناکننگ آن ریلوے نا کٹیا ٹی ودکی مریک۔ شیخ رشید احمد پارے کہ داسکان ٹرینک کم ءُ ولے منہ دے اٹی پین ٹرین چلینگک ، ملک اٹی 2 ہزار ریلوے کراسنگ ہندن ءُ ہرافیتا پھاٹک اف، داخہ وسیلہ اف کہ پھاٹک خلنگ کین، ہندا تُو رحمان بابا ٹرین نا بناءِ کینہ، ریلوے آ خلقت پت کرینے، گرین لین نا اسہ پین کوچ اس اتنگ اُن۔ شیخ رشید احمد پارے کہ نالہ لئی ایکسپریس نا فیصلہ دہ دے اٹی مریک۔ نن ہنداخہ جائز ٹول تخنہ کہ غٹ ءِ فائدہ مریک ، نجی گاڈیک ہم داکان گدرینگ انگ کیرہ ۔ اوپارے کہ گرین لین نا ٹکٹ اٹی ودکی کرینن اونا ڈیمانڈزیات ئس۔
